Ҳамроқул Асқар
Т Ў Л А Р
Куз келса чаманлар хасларга тўлар,
Юраклар бир мунгли сасларга тўлар.
Баҳор келгайму деб энтикса диллар,
Соғинчлар қирлару пастларга тўлар.
Ажрата олмасанг яхши ёмонни,
Ватанинг беватан касларга тўлар.
Қирғоғидан тошса зулм тўфони,
Томоқлар қовжираб басларга тўлар.
Дийдорини сўраб оҳ чексак агар -
Осмонлар Ҳақ деган дастларга тўлар.
Саҳар ибодатга шошса мўминлар,
Мачитлар дуодан мастларга тўлар.
Зулмат абадиймас, келар ҳур замон,
Дўстларнинг қучоғи дўстларга тўлар.
04.03.1990 йил.
|
