Россияда яна уч ўзбекистонлик ўлдирилган
Давлат
Қудрат
Би-би-си, Москва
Челябинск вилоятининг Магнитогорск
шаҳрида уч нафар Ўзбекистон фуқароси отиб ўлдирилган. Ҳодиса юзасидан жиноий иш
қўзғатилган.
Вилоят Ички ишлар бошқармасининг хабар
беришича, баданлари ўқдан илма-тешик бўлган ўзбекистонликларнинг жасадлари
қурилиш материаллари сотиладиган Савдо маркази яқинидаги асаларичилик хўжалигида
топилган.
Ўлдирилганларнинг шахслари аниқланган ва
уларнинг 60, 48 ва 34 ёшда бўлганликлари айтилади.
Дастлабки тергов натижаларига кўра, улар
тўрт йилдан буён Магнитогорск шаҳрида асал мумкатакларини келтириб сотиш билан
шуғулланишган.
Ҳуқуқ-тартибот идоралари юз берган
қотиллик юзасидан икки хил тахминни илгари суришмоқда. Улар ўзбекистонликларнинг
шахсий ғараз ёки миллий нафрат асосида ўлдирилган, деган фараз асосида текширув
олиб бораётганликларини билдиришган.
Бу биринчи ҳодиса
эмас...
Бундан роппа-роса бир ой олдин Москва
шаҳар прокуратураси жойлашган бино ҳовлисида бир гуруҳ тақирбошлар ўзбекистонлик
фаррош йигитни пичоқлаб ўлдиришганди.
Ушбу воқеага алоқадор шахсларнинг қўлга
олинганликлари ҳақида ҳозирча бирор бир маълумот берилмаган.
Кузатувчилар Россияда Марказий осиёлик
меҳнат муҳожирларини ўлдириш ҳоллари ортиб бораётганини таъкидлаб келишади.
Инсон ҳуқуқлари бўйича Москва бюроси
ташкилотининг ҳисоб-китобларига кўра, жорий йилнинг январидан май ойига қадар
Россияда миллий нафрат заминида 26 инсон ўлдирилган ва саксонга яқини тан
жароҳати олган.
Ташкилотнинг билдиришича, Россияда
миллатчи гуруҳларнинг ҳужумларига энг кўп Ўзбекистон фуқаролари йўлиқишади ва
биргина жорий йилнинг сўнгги беш ойида 6 нафар ўзбекистонлик уларнинг қўлларидан
ўлим топган.
Ўз навбатида кузатувчилар Ўзбекистон ўз
фуқароларининг Россияда ўлдирилиши ёки калтакланиши ҳолларига деярли бирор бир
муносабат билдирмай келаётганига ишора этишади.
Мен суҳбатлашган Москва вилоятида
ишлаётган ўзбекистонлик меҳнат муҳожирлари ўз тақдирдошларининг муаммолари ўзбек
раҳбариятини қизиқтирмаслигини айтишади.
Ушбу масала юзасидан Москвадаги Ўзбекистон элчихонаси
расмийларига қилган мурожаатим эса, ҳар галгидек бесамар якун
топди
| 
