'Масжидга қарши ҳужумда АҚШнинг қўли бор' Эронлик мулозимларнинг айтишларича,
масжидга қарши уюштирилган сўнгги ҳужум ортида турган кишилар Америка томонидан
ёлланган. Эроннинг жанубий-шарқий Зоҳидон шаҳрида юз
берган портлаш ўндан ортиқ инсоннинг умрига зомин бўлган ва яна 125 нафарини
яраланганди.
Расмий Теҳронга кўра, юз берган ҳодиса
ортидан уч киши ҳибсга олинган.
Ҳудуд
жўғрофияси
Зоҳидон Эроннинг Систон ва Балужистон
вилоятлари маркази саналади. Мухбиримизнинг хабар беришича, шаҳар бир қанча
қуролли бангивор тўдалар ва жангари гуруҳларнинг фаолият олиб боришлари билан
таниқли.
Расмий Теҳрон 1979 йилги Исломий инқилоб
ортидан вазият анча яхшиланганини таъкидласа-да, вилоят Эроннинг тараққиётдан
умуман четда қолган ҳудудларидан бири деб ҳисобланади.
Зоҳидоннинг аксарият аҳолиси сунний
мусулмонларидир. Улар асосан шиалардан иборат Эронда сунний озчилигини ташкил
этишади. Суннийларнинг кўпчилиги балужлардир.
Вилоятнинг ўзи ҳам Покистон ва ҳам
Афғонистон билан чегарадош.
Ҳозирча савол очиқ
қолмоқда
Портлашга масъулиятни ҳозирча бирор бир
гуруҳ ўз зиммасига олмаган.
Ҳудудда фаолият олиб борувчи гуруҳларнинг
айримлари сунний озчилигини ташкил этувчи балужларнинг ҳуқуқлари йўлида кураш
олиб боришларини айтиб келишади.
Ҳужумда эса, шиалар учун қадрли бўлган
масжид нишонга олинган ва ҳодиса шиаларнинг табаррук диний маросимлари билан бир
пайтга тўғри келган.
Портлашнинг худкушлик ҳужуми бўлганига оид
нишоналар бор. Бу эса, хужум Исломий жангари гуруҳининг иши эканига далолат
қилади.
Сўнгги хабарларга кўра, 12 июнга
мўлжалланган президентлик сайловларида арафасида Зоҳидонда вазият анчайин танг.
| 
