Гавҳар Жўраева - Россиядаги муҳожирлар ҳуқуқлари фаоли

Гавҳар Жўраева - Москвадаги "Муҳожирот ва Қонун" ҳуқуқий-ахборот маркази раҳбари.

Асли ҳуқуқшунос бўлган Гавҳар Жўраева Россияга ишлаш учун келган марказий осиёлик меҳнат  муҳожирлари ҳуқуқларини ҳимоя  қилишни бош мақсади, деб билади.

Мазкур мустақил ташкилот, асосан, меҳнат муҳожирлари  ҳақ-ҳуқуқларини таъминлаш ва ўта оғир ҳолатларда амалий ёрдам  кўрсатиш билан шуғулланади.

Хусусан, иш берувчилар қўлида ҳуқуқлари топталаётган, маошларини ололмаган муҳожирларга марказ ҳуқуқшунослари бепул ёрдам беришади.

Турли сабабларга кўра Россиядан депортация қилинишга юз тутган марказий осиёликлар ҳам айни марказга кўмак сўраб мурожаат этадилар.

Шунингдек, муҳожирларнинг фарзандларини боғча ва мактабларга жойлаштириш, бемор бўлиб қолган муҳожирлар учун тиббий ёрдамлар ташкил этиш ва баъзида, асосан, тожикистонлик муҳожирлар оламдан ўтганда, жасадларини ватанга юбориш ишлари ҳам марказ фаолиятида кўзга ташланади.

Ушбу марказ Оврўподан оладиган грантлар ҳисобидан иш юритади.

Гавҳар Жўраева Россиядаги турли нашрлар ва русийзабон интернет саҳифаларида ҳам марказий осиёлик меҳнат муҳожирларига оид таҳлилий мақолалари билан иштирок этиб келади.

Унинг бир суҳбатида таъкидлашича, ҳатто 90% россиялик иш берувчилар ҳозир Қирғизистон, Тожикистон ва Ўзбекистондан келган ноқонуний муҳожирларни ишлатишади. Сабаби - булар арзон ишчи кучи.

Гавҳар Жўраевага кўра, Марказий Осиёдан Россияга келадиган муҳожирларни қонуний, рисоладагидек йўлда ишга ёллаш ва бу ерда ишлаш ҳамда яшаш давомида уларнинг барча ҳақ-ҳуқуқлари ва шароитларини таъминлаш зарур.

Халқаро молиявий инқироз бўй кўрсатган ўтган январ ойида ҳам Гавҳар Жўраева ўз суҳбатларидан бирида Россияда барчага иш етишини, муҳожирлар асло россияликлар қўлидаги ишларни тортиб олмасликларини айтганди.

Унинг фикрича, Россиядаги муҳожирларга оид қонунлар номукаммал, ўлда-жўлда ва аниқ чизилган йўналишга эга эмас. Шу боис кўп ҳолларда ирқчилик ҳоллари юзага чиқмоқда.

Аммо ҳозирда минглаб марказий осиёлик муҳожирлар Россия иқтисодига ҳам салбий таъсир этган инқироз туфайли ватанга қайтишмоқда. Қолганлари ҳам яқин келажакда ўзларини нима кутаётганини билишмайди.

Россиядаги меҳнат муҳожирлари ҳуқуқлари фаоли Гавҳар Жўраевага саволларингизни ўнг тарафдаги махсус форма орқали жўнатинг.

Ёки uzbek@bbc.co.uk электрон почта манзилига ҳам хат йўллашингиз мумкин.

Гавҳар Жўраева билан суҳбатимизни эса келаси шанба куни Би-би-си Ўзбек Хизмати "Дараклар" дастурида тиниглаб, суҳбат матнини вебсаҳифамизда ўқий оласиз.

Саволларингизни кутамиз.