Меҳнат муҳожирлари ҳуқуқларига оид шартнома
Давлат Қудрат Би-би-си, Москва
Россия Думаси меҳнат муҳожирларининг иш фаолияти ва ҳуқуқларини ҳимоя қилиш ҳақидаги Ўзбекистон ва Россия ўртасидаги шартномани
ратификация қилган.
Ушбу шартномага мувофиқ тарафлар икки мамлакат фуқароларини расман ишга олиш имконига эга бўладилар.
Шунингдек, ҳам Россия ва ҳам Ўзбекистон меҳнат қилиш учун зарур бўлган барча турдаги ҳужжатларни ҳеч қандай текширувларсиз
тан олишади.
Ушбу ҳужжат Россияда меҳнат қилаётган юз минглаб ўзбек муҳожирларини ҳар томонлама ҳимоя қилиш имконини яратиши кутилмоқда.
2007-йилнинг ёзида Тошкентда Россия ва Ўзбекистон ҳукуматлари имзолаган ушбу ҳужжат ҳар икки мамлакат меҳнат муҳожирлари
ҳуқуқларини ҳимоя этишга қаратилгани айтилади.
Келишув бўйича Россияга келаётган Ўзбекистон фуқаролари меҳнат шартномаси асосида ишлашлари талаб этилади.
Шу қаторда муҳожирлар учун тиббий хизмат иш берувчи ҳисобида бўлиши шарт эканлиги айтилади.
Ўзбекистон ва Россия ҳукуматлари эришган келишувда меҳнат муҳожирга тўланадиган иш ҳаққи ва улар яшаш шароити, қабул қилувчи
мамлакат фуқароларига тўланадиган ҳақ ва яшаш шароити даражасидан паст бўлмаслиги ўз аксини топган.
Айни вақтда Россия Миграция хизмати расмийларига кўра Дума ратификация этган ҳужжат меҳнат муҳожирлари муаммосини Ўзбекистон
томони билан биргаликда давлат даражасида ҳал этишга ёрдам беради.
Москвадаги
нодавлат "Меҳнат миграцияси" ташкилотининг раҳбари Николай Курдюмовнинг
фикрича кучга кирган ҳужжат Россияда ноқонуний юрган ўзбекистонлик
муҳожирларини легал йўлга ўтишларига ёрдам беради.
"Энг аввало
ушбу келишув Ўзбекистон ва Россия орасида меҳнат муҳожирлари
муаммоларини ечиш учун асосий замина сифатида хизмат қилади. Россия
ҳудудида эндиликда миграцияга оид Ўзбекисонга тегишли идоралари
очилади. Бундан ташқари келишувда ҳар икки томондан иш гуруҳлари ташкил
этилиши ҳам кўзда тутилган. Менимча, эндиликда Ўзбекистон ҳокимиятининг
Россиядаги ўзбек муҳожирлари муаммолари билан шуғулланишига яхши
имконият пайдо бўлади",- дейди "Мехнат миграцияси" ташкилоти раҳбари
Николай Курдюмов.
Ўз навбатда мутахассислар Россия ва Ўзбекистон орасида кучга кирган ҳужжат Россиядаги Ўзбекистон фуқаролари оғирини енгил
қилишига шубҳа билан қарашади.
Ўзбекистонлик таҳлилчи Суҳроб Исмоиловнинг фикрича, муҳожирлар ҳуқуқларини ҳимоя этувчи ҳужжатнинг амалда тадбиқ этилиши
учун етарли шароит йўқ.
"Россия
ҳудудларида меҳнат муҳожирлари сифатида юрган ҳамюртларимизнинг
кўпчиликлари норасмий йўллар орқали иш топишни маъқул кўришади. Улар бу
ҳолнинг сабабларини расмий ишга жойлашиш турли хил ҳужжатбозлик билан
боғлиқ эканлигини айтишади. Ҳозирги кунда имзоланган шартноманинг фақат
расмий аҳамияти бор. Агар бу шартнома ҳақиқатдан ҳам ҳаётда фойдали
ҳужжатга айланишини исташса, ҳукуматлар муаммога кенгроқ қарашлари
керак",-дейди Суҳроб Исмоилов.
Россия Федерал Миграция хизматига кўра, жорий йилда Россияга 2 миллионга яқин Ўзбекистон фуқаролари қонуний йўл билан келган.
|