Обаманинг Ислом дунёсига қаратилган нутқи қандай кутиб олинди?
|
|
Жаноб Обама мусулмон дунёси билан муносабатларни янгидан бошлашни исташини билдирди |
Президент Обаманинг 4-июн куни Қоҳирада Ислом дунёсига қарата қилган нутқи қизғин баҳсларни уйғотди.
Жаноб
Обама ўз маърузасида Америка Қўшма Штатлари ва бутун жаҳондаги
мусулмонлар ўртасидаги алоқаларни қайтадан бошлашга чақирганди.
Президент Обаманинг Қўшма Штатлар билан мусулмон дунёси ўртасидаги муносабатлар истиқболига билдирган нуқтаи назари умуман олганда мусулмон дунёсида ижобий қаршиланди.
Аммо, АҚШ Президентининг Қоҳирадаги маърузасига Ғарбда билдирилаётган муносабатлар ҳақида бундай деб бўлмайди.
Жаноб
Обаманинг етказмоқчи бўлган асосий муждаси - мусулмон дунёси билан
муносабатларни янгидан бошлашни исташи, бундан кейин икки томон
бир-бирини ҳурмат қилиши ва ўзаро тил топиши учун ўртадаги
келишмовчиликларни аритишни кўзлагани бўлган экан, бутун дунё "қани
жаноб Обама Исроил-Фаластин муаммоси ҳақида нима деркин", деб кутиб
турди.
"Фаластин халқининг аҳволи чидаб бўлмайдиган даражада ёмон. Америка Фаластин халқининг ўз қадриятлари, имкониятлари ва давлатига
эришиш йўлидаги қонуний мақсадидан юз ўгирмайди",- деб айтди Президент Обама.
Исроил
расмийларининг жаноб Обама нутқига муносабати эҳтиёткорона бўлди -
ҳукумат расмийлари, ушбу мурожаат Исроилнинг Араб ва мусулмон дунёси
билан ярашишига етаклашиши мумкин, дейиш билан бирга ўзларининг миллий
хавфсизликлари устувор вазифа бўлиб қолаверишини урғуладилар.
Олмония канцлери Ангела Меркел Президент Обама маърузасига юқори баҳо берди.
"Бу маъруза Араб дунёсига эшик очиб, Яқин Шарқда тинчликни ўрнатиш амалларини қайта тиклашга "беқиёс имконият яратади",- деди
Меркел хоним.
Мамлакати бу жараёнда кўмаклашишга тайёрлигини билдирган Олмония канцлери: "Икки давлат ўртасидаги муаммо ҳал этилишига"
муҳтожмиз",- деб айтди.
Ғарб матбуотига кўз ташланаркан, оммавий ахборот воситаларида жаноб Обама нутқи нақадар самара бериши саволи кўп қўйилганини
кўриш мумкин.
"Мисол учун Чехияда чоп этиладиган "Млада" рўзномаси "Обаманинг Қоҳирадаги маърузаси мусулмонлар онгини ўзгартирмайди", деб
ёзади.
"Барак Обама руҳоний ёки имомга ўхшаб гапирди", дейилади рўзномада. Аммо, дейди рўзнома, Барак Обама охирида йиллар давомидаги
ишончсизликни бир маъруза ўзгартиролмайди, деб айтди".
Американинг ўзида жаноб Обама нутқи қандай қабул қилинган?
Президент
Обаманинг ватанида ҳам мусулмон дунёсига мурожаати кўп ҳам хуш
қаршиланаётгани йўқ. Америка мусулмонларининг муносабати бу нутққа илиқ
бўлган бўлса-да, Би-би-сининг Шимолий Америка бўйича муҳаррири Жастин
Веб ёзишича, кўплаб консерватив қарашдаги америкаликлар бундай
оҳангдаги чиқишга эҳтиёж йўқ, деб ҳисоблашади.
Афтидан кўп
анъанадор америкаликлар Буш маъмуриятининг Яқин Шарқдаги сиёсати
муваффақиятсизлигини қоралаш билан қабул қилмайдилар. Улар Америка
президентининг сиёсий репрессив араб мамлакатига бориб, ярашув
оҳангидаги маъруза қилишига эҳтиёж йўқ эди, деб ҳисоблашади ва улар
назарида бу Америка қудратини ожизлантиради
|