Россия Прокуратурасига кўра, самарқандлик Фарҳод Турсуновга қўйилган айблар маҳкама жараёнида тўла исботланган.

Маҳкама ҳукмига кўра, Фарҳод Турсунов Бешнованинг оиласига 4 миллион рубл, яъни тақрибан 150 минг доллар товон пули тўлайди.

Анна Бешнованинг ота-онаси ҳам маҳкама ҳукмидан норози эканларини айтишган ва Фарҳод Турсуновга бир умрлик қамоқ жазоси берилишини талаб этишган.

Ўз навбатда айбланувчининг ҳимоячиси Фарҳод Турсуновнинг ушбу жиноятга алоқаси йўқлиги ва маҳкама қароридан норози эканини билдирган. Ҳимоячи Россия олий судига аппелация шикояти беришини маълум қилган.

Унга кўра, Фарҳод Турсунов рус тилини яхши билмагани учун ҳам ўзи содир этмаган жиноятини бўйнига олишига сабаб бўлган. Фарҳод Турсунов ҳибсга олингунига қадар Москвада фаррош бўлиб ишлаётган бўлган.

Айни вақтда москвалик ҳуқуқ фаоли Баҳром Ҳамроев Россияда рус тилини яхши билмаган меҳнат муҳожирларига нисбатан кўп ҳолларда мамлакат маҳкамалари адолатсиз ҳукм чиқариши ва бундай ҳоллари кенг тарқалганини таъкидлайди.

"Шу ҳукумат тарафидан берилган адвокат тасдиқлаяпти Фарҳод Турсуновнинг жиноят қилмаганлигини! Умуман, Ўзбекистон ва Тожикистон фуқароларига жиноий ишлар жуда кўп сохталаштирилади",-дейди ҳуқуқ фаоли Баҳром Ҳамроев.

15 ёшли Анна Бешнованинг жасади ўтган йилнинг октябрида Москва жанубидаги мактаб ҳовлисидан топилганди. Бешнованинг ўлдирилиши Россия жамиятида катта шов-шувларга сабаб бўлганди. Ҳодиса юз берган куннинг эртасига воқеа юз берган Москванинг Мажайск ҳудудида маҳаллий аҳоли ва миллатчи гуруҳлар меҳнат муҳожирларига қарши қатор намойишлар ўтказишганди.

Москва шаҳри ва вилоятида кетма-кет кўча тозаловчиларни калтаклаш ва ўлдириш ҳоллари юз берди.