Мазкур база Афғонистондаги НАТО амалиётлари учун ниҳоятда муҳим саналарди.

Қирғизистондан келаётган қарама-қарши хабарларга кўра, Америка ҳарбийлари "Манас" ҳаво қўналғасидаги базадан ўз заҳиралари ва асбоб-ускуналарини олиб чиқиб кетишни бошлашган.

Бу ҳақда кун аввалида дунёнинг бир қатор етакчи ахборот агентликлари хабар тарқатишганди.

Бироқ Қирғизистонда бўлган мухбиримизнинг айтишича, "Манас" ҳарбий базаси матбуот хизмати бу каби хабарларни на-да рад этган ва на-да тасдиқлаган. Қирғиз мулозимлари ҳам бу борада ўзларида ҳеч қандай маълумот йўқлигини билдиришган.

Ҳаво базасининг расман август ойида ёпилиши кутилмоқда.

Мазкур база Афғонистондаги НАТО амалиётлари учун ниҳоятда муҳим саналади ва Американинг Марказий Осиёдаги ҳарбий ҳозирлигини таъминлаётган ягона базаси эди.

Бироқ Қирғизистон ҳукумати жорий йил бошида америкаликларни базадан чиқариб юбориш қарорига келган ва "Манас"ни тарк этишлари учун америкалик ҳарбийларга олти ой муҳлат берганди.

Расмий Бишкекнинг қарори ортидан АҚШ мулозимлари Қирғизистоннинг ўз фикридан қайтиб қолишига умид қилаётганликларини айтишганди.

Бироқ улар Россия, Ўзбекистон ва Тожикистон орқали муқобил таъминот йўлларини топишга ҳам ҳаракат қилишаётганди.

Лекин,..

Ўтган ҳафта Қирғизистоннинг юқори мартабали мулозими Америка бошчилигидаги коалициянинг "Манас" ҳаво қўналғасидаги ҳаво базасидан фойдаланишда давом этишига рухсат берилиши мумкинлигини айтганди.

Қирғизистон президенти девонининг ташқи алоқалар департаменти бошлиғи Ойбек Молдогазиев Афғонистон Президенти Ҳомид Карзай базадан фойдаланишда давом этишга рухсат берилишини сўраб мурожаат этгани ва айни масала келаси ҳафта қирғиз-афғон президентларининг Москвадаги учрашуви чоғида муҳокама қилинишини билдирганди.

"Манас"даги ҳаво базаси Афғонистонда Эркинликка Эришиш Амалиётини дастаклаш мақсадида БМТ ваколати остида фаолият юритиб келган.

Халқаро аксилтеррор коалициясига аъзо 11 давлат билан "Манас"даги базадан фойдаланишга оид битим 2001 йилнинг декабр ойида имзоланганди.

Қирғиз ҳукумати Россиянинг молиявий ёрдамга оид ваъдаси ортидан базани ёпиш қарорига келгани айтилганди.

Икки давлат раҳбарларининг жорий йил бошида бўлиб ўтган учрашуви чоғида Россия Қирғизистонга икки миллиард доллардан кўпроқ қарз ва бошқа молиявий ёрдамларни ажратишга ваъда қилганди.