Беларус-Россия чегарасида божхона текширувлари
|
|
Божхона текшируви Россия билан Беларус ўртасидаги савдо баҳсининг кучаяётгани сифатида кўрилмоқда |
Беларус ўзининг Россия билан чегараларида божхона текшируви нуқталарини барпо этган, бунга Россиянинг Беларус сут маҳсулотларига
тақиқи сабаб бўлган.
Би-би-си мухбирининг ёзишича, икки мамлакат ўртасида 1995 йилдан буён илк бор божхона назорати кучайтирилган, бу Россия билан
Беларус ўртасидаги савдо баҳсининг янада кучаяётганининг аломатидир.
Беларус ҳукумати ўз қарорини Россиянинг июн ойида Беларусда тайёрланган юзлаб турдаги сут маҳсулотларини киритишга жорий этган
тақиқига жавоб эканини айтмоқда.
Мухбирларнинг ёзишларича, ҳозир Россияни Беларус билан боғлайдиган асосий автомобил йўлларига божхона ходимлари чиқарилган,
Беларус ҳудудига кирадиган жойларда текширувлар бошланган.
Илгари фақат автомобил ҳаракати хавфсизлиги зобитлари ва суғурта масъуллари турган Беларуснинг Витебск ва Россиянинг Смоленск
ва Бранск вилоятлари туташган жойларга божхоначилар ҳам чиқарилган.
Бохоначилар юк ортиб бораётган автомобилларни ва юкларни текширмоқдалар.
|
|
"Сут уруши"нинг Беларус иқтисодиётига салбий таъсири жиддий бўлиши айтилмоқда |
Россия Қишлоқ хўжалиги вазирлиги 2009 йилнинг 15 июнидан 30 сентябригача Беларусда тайёрлаган сут кукунини Россия ҳудудига
киритмасликка қарор қилингани ҳақида маълум қилган.
Мулозимларга кўра, Беларус сут кукуни Россияда сут ва сут маҳсулотларига жорий этилган талабларга жавоб бермайди.
Мухбирлар
"сут уруши" деб номлаган можаро Россиянинг "Роспотребнадзор" идораси
даставвал 600 турдаги сут маҳсулотларини тақиқлагани билан бошланди.
"Роспотребнадзор"дан билдиришларича, улар 2008 йил охирида Россияда кучга киритилган истеъмол маҳсулотлари учун янги тартибни
ҳаётга жорий этмоқдалар.
Мухбирларимизнинг ёзишларича, россиялик мулозимлар янги тартиб бўйича ишлаш нега орадан ярим йил ўтиб бошлангани борасида
изоҳ бермаганлар.
Аммо кўпчилик охирги пайтда Россиянинг Беларусга 500 миллион долларлик қарзни Россия рублида бериш қарори атрофида Минск ва
Кремль ўртасида "даҳанаки жанглар" бўлиб ўтганига эътибор қаратганлар.
Россия
расмийлари ҳисоб-китобларига кўра, Россия истеъмол бозоридаги жами сут
маҳсулотларининг 7-10 фоизини Беларус сут маҳсулотлари ташкил этади.
Россия тақиқлови эса Беларус иқтисодиётига жиддий салбий таъсир кўрсатиши мумкинлиги айтилади.
Беларусда қайта ишланадиган 6 миллион литр сут маҳсулотларининг 4 миллиони Россияга экспорт қилинган
|