Uznews.18.06.09 15-16 июн кунлари Екатеринбургда бўлиб ўтганШанхай хамкорлик
ташкилоти йиғилишида Ислом Каримовга яна 1993 йилдан бери айтиб
келаётган ўзи ёқтирган халқаро мавзуда – Афғонистонда барқарорлик
ўрнатиш мавзусида гапиришга имкон туғилди.
Ўттиз йилдан бери Афғонистонда давом этиб келаётган урушлар,таназзуллар
ва офатлар мамлакатнинг шимолий қўшниси бўлган Ўзбекистон ва унинг айёр
президенти учун яхши фойда келтираётган манбаага айланган.
Илк бор жахон миқёсидаги сиёсатшунос деган тасаввур қолдириш ва ўзига
э’тибор қаратиш учун Ислом Каримов 1993 йилнинг август ойида БМТда
сўзга чиқиб, Афғонистон муаммосини кўтариб чиққан ва шу ташкилот а’зоси
бўлган эди.
Сўнги пайтларда Афғонистон Ислом Каримов учун мамлакат ичкарисидаги
зиёлилар ва диний мухолифатга қарши қўллаган қатағонларини ва
мамлакатда иқтисодий ва сиёсий реформалар ўтказишни хохламаганлигини
оқловчи воситага айланди. Мамлакатдаги инсон хуқуқлари билан боғлиқ хар
қандай танқидга у ”яқинида толиблар бўлганлиги учун либерализмга ўта
олмаслигини ” рўкач қилади.
2001 йил 11 сентябр АҚШ да содир бўлган воқеадан ғоятда хурсанд бўлиб
кетган Каримов АҚШ билан терроризмга қарши уруш хамкорига айланди, уни
Вашингтонда яхши кутиб олишди ва унинг хазинасига миллионлаб Америка
ёрдами оқиб кела бошлади.
2005 йил 13 май куни тинч намойиш Каримов томонидан қириб ташланганидан
сўнг бечора Афғонистон Каримовга ён босди. Америка ва НАТО Андижон
қирғини ва қурбонлари хақида яхши хабардор бўла туриб, Каримовга ёрдам
беришдан қайтмади.
Хозирда Афғонистонга хаётий зарур махсулотни етказиш бўйича хизматларни
Каримов президент Барак Обама бошчилигидаги АҚШ ма’муриятига тақдим
этмоқда.
Гўе, Афғонистон Каримовга бу ўйинни давом эттириш, ўз ёнини сақлаш ва
бошқа мамлакатлар назарида бу диктатор ва одам ёқмас президентнинг
мавжудлиги хақида қандайдир тасаввур қолдириш имконини берди.
Аммо Каримов Афғонистонга махкам ёпишиб олган ва Афғонистон муаммосини
чайнашда давом этмоқда, чунки халқаро аренада у гапирадиган гапнинг ўзи
йўқ.
Афғонистонда тинчлик ўрнатиш қобиғи остида янги ташаббуслар бераётган
ва бир пайтлар яхши сиёсатчи бўлишни орзу қилган Каримов жахон
сиёсатида яна қандайдир ўрни қолганлигини билдиришга тиришиб бошқаларни
хам, ўзини хам алдаб келмоқда.
Бундан ташқари, Афғонистон хақида гапириб, у ўзининг 20 йиллик
диктаторлиги даврида Афғонистондан баттар даражага тушиб қолган,
худудий келишмовчиликлардан боши чиқмайдиган Ўзбекистон хақида
гапиришдан қочади.
Мана яна Екатеринбургда Каримов ”глобал хавфсизлик, халқаро терроризмга
қарши кураш, наркотрафик, хавфсизликка тахдид” каби сўзлардан бўшамади,
вахоланки ўз мамлакатида содир бўлаётган воқеаларни айтиш етарли эди.
Ўзбекистон хам ёна бошлагани, қандайдир кимсалар ўзбек милиционерларини
портлатаётгани, улар қўшни Қирғизистондан кирган деган тахмин борлигини
Каримов айтмади. Каримовга бўйсунган оммавий ахборот воситаларининг
Қирғизистонга хужуми, уларнинг бу мамлакатни тўғридан тўғри
террорчиларни йўллаб қувватлашда айблаганини тушунтириб ўтирмади.
Тожикистон президенти Эмомали Рахмоннинг хам ташрифидан фойдаланиб у
нега тожик исте’молчиларга газни икки баробар қисқартирганини
тушунтирмади ва ўша ёқнинг ўзида қирғиз ва тожик хамкасблари билан сув
муаммосини хал қилиб олмади.
Бунинг ўрнига Каримов Афғонистон хақида гапирди. Унинг фикрича 30
йилдан бери Афғонистонда давом этаётган урушни тўхтатмасдан туриб,
Марказий Осиёда хавфсизлик ва барқарорлик хақида гапириш фойдасиз.
Бу фикрга қўшилмаслик қийин, аммо Афғонистондаги урушсиз Ислом Каримов нима қиларди?
Uznews.net