Москвадаги биноларнинг анчаси 1930 йилларда қурилган

Москва марказида таъмир этилаётган тўрт қаватли уйнинг қисман ағдарилиши натижасида уч инсон ҳалок бўлган.

Расмийларга кўра, бино вайроналари остидан олти нафар Ўзбекистон ва Тожикистон фуқароси қутқариб олинган.

Бинода ноқонуний яшаган қирққа якин Ўзбекистон ва Тожикистон фуқаролари милиция идорасига олиб кетилган.

Москва расмийлари маълум қилишларича, ағдарилган бино жойида қутқарув ишлари тугатилган ва текширув олиб борилмоқда.

Дастлабки маълумотларга кўра, бино пойдеворининг эскириб кетгани ва таъмир ишлари уйнинг олд томони ва деворларнинг ағдарилишига сабаб бўлган бўлиши мумкин.

Бинонинг 1930 йилларда қурилгани айтилган.

Таъмир ишларини марказий осиёлик меҳнат муҳожирлари амалга ошираётган бўлганлар ва улар шу ерда яшаганлар.

Москва расмийлари бино қулаши оқибатида ҳалок бўлган уч инсон шахси аниқланаётганини, улар меҳнат муҳожирлари экани айтилади.

Москва Муҳожирлик хизмати расмийларининг айтишларича, қулаб тушган бино жойида қўлга олинганларнинг аксариятида ишлаш рухсатномаси ва Россия пойтахтида қайддан ўтгани ҳақидаги ҳужжатлари бўлмаган.

Расмийлар Россия ҳудудида ноқонуний ишлаган 33 Ўзбекистон ва Тожикистон фуқаросини мамлакатдан чиқариб юбориш масаласи кўриб чиқилаётганини айтганлар.

Айни пайтда Россиянинг Ленинград вилоятидан олинган хабарларга кўра, у ерда икки Ўзбекистон меҳнат муҳожири пичоқлаб кетилган.

Фожеа 17 июн тунда Ленинград вилоятининг Кировск шаҳрида рўй берган.

Ички ишлар идорасидан маълум қилишларича, 59 ёшли ва 19 ёшли Ўзбекистон фуқароларининг жасади темирйўл яқинидаги турар-жой биноси яқинида топилган.

Икки инсонга жуда кўп марта пичоқ урилгани хабар қилинган.

Қотиллик юзасидан жиноий иш очилган, ҳуқуқ-тартибот органлари ҳозирча ҳеч ким ҳибсга олинмаганини билдирганлар.

Инсон ҳуқуқи ҳимоячиларига кўра, меҳнат муҳожирларини ўлдириш ҳоллари Россия шаҳарлари орасида Москва ва Санкт-Петербургда кўп рўй беради.

Бундан уч ой илгари Санкт-Петербург шаҳрида 30 яшар Ўзбекистон фуқароси пичоқлаб ўлдирилган.