Профессионал боксда WBA йўналишининг энг оғир вазн тоифаси бўйича Жаҳон чемпиони ўзбекистонлик таниқли боксчи Руслан Чагаев бугун украиналик машҳур боксчи Владимир Кличкога қарши рингга тушади.

Икки наҳанг боксчи орасидаги жанг Олмониянинг Гельзенкирхен шаҳрида бўлиб ўтади.

Руслан Чагаев ва россиялик боксчи Николай Валуев орасида ўтган май ойида бўлиб ўтиши режаланган беллашув нақ учрашув арафасида бекор қилинганди.

Хабарларда ўзбекистонлик таниқли боксчининг Финляндия Бокс федерациясининг тиббий талабларига жавоб бера олмагани айтилганди.

Руслан Чагаевга промоутрлик қилаётган Олмониянинг Universum Box-Promotion клуби мазкур ҳодисадан ўзбекистонлик боксчи руҳий тушкунликка тушганлигини билдирганди.

Биз жанг арафасида Руслан Чагаевнинг кайфияти ва тайёргарлигини билиш мақсадида унинг бош мураббийси ёрдамчиси, профессионал боксда енгил вазн тоифасининг барча асосий версиялари бўйича бир неча карра жаҳон чемпиони Артур Григорян билан боғландик:

Артур Григорян: Русланнинг аҳволи руҳияси ва тайёргарлиги аъло даражада. Мен унинг қандай шуғулланаётганини кўрдим, мураббийси Михаэл Тиммнинг ёнидан силжиганим йўқ. Руслан бўлажак жангга пухта тайёргарлик кўрган. Шунинг учун ҳам эртанги куннинг “Ўзбек” куни бўлишига умид қиламиз ва буни Худодан ҳам сўраб қоламиз. Руслан ҳам ўзини ҳеч қачон ҳозиргидек яхши ҳис қилмаганини, шунинг учун ҳар тўрттала камарни ҳам она Ватанига олиб кетиш учун бор имкониятини ишга солиши лозимлигини айтмоқда.

Би-би-си: Артур ака, дейлик эртага Ҳельсинкида бўлганидек ҳодиса юз бермаслигига ким кафолат беради? Яъни Русланни яна носоғлом, деб топиш эҳтимоллари қанчалик?

Артур Григорян: Йўқ, ким нима деса деяверади. Русланнинг қўлида дунёнинг манаман деган профессорлари, шифокорларининг имзоси чекилган тиббий хулоса, тиббий ҳужжатлар бор. Уларда Русланда ҳеч қандай юқумли хасталик йўқлиги, рингга тушиш даражасида соғлом экани айтилган. Профессорлардан бири бошқа боксчиларнинг Русланнинг соғлиғидан хавотирланишларига ҳеч бир асос йўқлиги, агар ундан боксчи сифатида қўрқишса, бунинг бошқа гап эканини айтди. Шунинг учун ҳам, кўз тегмасин, унинг соғлиғи аъло даражада. Руслан ўзини жуда яхши ҳис этмоқда. Энди у фақат рингда ўзининг жангга қанчалик ҳозирлигини ва барча унвонларни қўлга киритиш аҳдида қанчалик қатъий эканини кўрсатиши лозим бўлади.

Би-би-си: Артур ака, профессионал ва жуда тажрибали боксчи сифатида Русланнинг Владимир Кличкога қарши эртанги жангда ғолиб чиқиш имкониятларини қандай деб баҳолайсиз?

Артур Григорян: Албатта, Русланда ғолиб чиқиш имконияти бор. Агар бундай бўлмаганида, мен сизга бу гапларни айтиб ўтирмаган бўлардим. Ҳам боксчи ва ҳам мураббий сифатида ҳаммасини чиройли сўзлар билан бежаган бўлардим. Лекин мен ҳозир сизга бор гапни айтаяпман: Руслан жуда яхши формада, унда кўп томонлама ижобий ўзгаришлар бор, малакаси ҳам янада ошган. Агар Руслан ўз техникаси ва тактикасига содиқ қолса, ғалаба у томонда бўлади. Русланга эртанги жангнинг ўзи учун шон-шарафли ёки ҳаммаси тескарисига кетса, ортга элтувчи йўлнинг ибтидоси экани яхши аён. У эртанги жангда далил олдинга кетиб, рақибига қарши ҳужум уюштириши, аниқ зарбалар беришга ҳаракат қилиши керак. Ўзи эса, иложи борича рақибининг зарбини ўтказиб юбормаслиги лозим. Буни Руслан яхши билади. Унинг бошқа танлови йўқ. Шунинг учун ҳам сизга шуни ваъда бераманки, Руслан эртага бутун маҳоратини ишга солади!

Ҳар иккала қўли билан ҳам зарба беришга қодир экани боис “Оқ Тайсон” лақабини олган Руслан Чагаев профессионал боксда 20 дан ортиқ жанг ўтказган ва уларнинг деярли барчасида ғалаба қозонган.

Руслан 2007 йилнинг апрел ойида қозонган ғалабаси ортидан россиялик ҳайбатли рақиби Николай Валуев билан белгиланган уч жангги олган жароҳатлари туфайли ортга сурилганди .

Бунинг ортидан ўзбекистонлик боксчи WBA томонидан “танаффусдаги чемпион” деб аталиб, унинг ваканцияси бўш экани эълон қилинганди.

Украиналик боксчи Владимир Кличко профессионал бокснинг энг оғир вазн тоифасида WBO, IBF ва IBO йўналишлари бўйича Жаҳон чемпиони саналади.

Кличконинг бўлажак рақиби британиялик Дэвид Ҳей олган жароҳати туфайли рингга туша олмаслигини баён қилиши ортидан энди у Русланга қарши жанг олиб боради.

Икковлон орасидаги эртанги беллашув эса, энг оғир вазн тоифасида WBO, IBF, IBO ва WBA йўналишлари бўйича жаҳондаги янги камар соҳибини аниқлаб беради.