Зўравонликлар бутун Шимолий Қафқос бўйлаб ёйилмоқда

Доғистон жумҳуриятида ички ишлар идорасига уюштирилган ҳужумда камида бир милиция ходими ҳалок бўлган, ўн икки киши яраланган.

Ҳужум Озарбайжон билан чегара яқинидаги Дарбанд шаҳрида содир бўлган.

Сўнгги ойларда Россиянинг мусулмонлар яшайдиган жанубий минтақасида жангариларнинг ҳужумлари кучайган.

Инсон ҳуқуқлари ташкилотлари қўшни Ингушетиядаги вазиятни "эълон қилинмаган фуқаролар уруши" дея тасвирлаганлар.

Нотинч минтақа

Икки ой муқаддам Москва Чеченистонда ўн йил давом этган урушнинг тугагани ва "ноқонуний қуролли гуруҳлар" устидан ғалабага эришилганини эълон қилган эди.

Би-би-сининг Москвадаги мухбири Руперт Уингфилд Хейсга кўра, бунга жавобан Москванинг бошқарувига қарши бўлган радикал исломий гуруҳлар Шимолий Қафқос бўйлаб ҳужумларни кучайтиришган.

Охирги ҳужум чоршанба куни ярим тундан сўнг содир бўлган.

Милиция идорасига ҳужум қилган қуроллилар бинони автоматлардан ўққа тутганлар, натижада камида бир милиция ходими зобити ҳалок бўлган, ўндан ортиқ одам яраланган.

Ўтган ҳафта қўшни Ингушетия Президенти Юнус-Бек Ёвқуров суиқасддан омон қолган эди.

Ҳануз шифохонада қолаётган жаноб Ёвқуровнинг аҳволи жиддий экани айтилмоқда.

Суиқасддан икки ҳафта муқаддам юз берган жангарилар ҳужумида Доғистон Ички ишлар вазири ўлдирилган.

У тўйда иштирок этаётган пайт снайпердан отиб, ўлдирилган.

Москва Чеченистондаги урушда ғалаба қозонганини даъво қилади, аммо ҳозирда Кремл Чеченистонга қўшни икки жумҳуриятда кенг миқёсдаги исёнчиликка юз тутмоқда.

Қонунсиз ҳокимият

Айни пайтда "Халқаро Амнистия" инсон ҳуқуқлари ташкилоти Россиянинг Шимолий Қафқосидаги "қонунсиз ҳокимиятни" қоралаган.

Ташкилот ҳисоботида айтилишича, минтақадаги кўп сонли инсон ҳуқуқлари бузилиш ҳоллари вазиятнинг нормаллашаётгани ҳақида гапиришга имкон бермайди.

Amnesty International нинг ҳисоботида Чеченистон, Ингушетия, Доғистон ва Қабардин-Болқордаги қийноқлар ва қотилликларга эътибор қаратилади.

Ташкилотнинг айтишича, ноқонуний равишда ушланган фуқаролар махфий қамоқхоналарда сақланади ва уларнинг яқинлари қўрқитилади.

"Халқаро Амнистия" бу борада қурбонлар ва шоҳидларнинг ҳикояларини келтирган.