Қирғизистон махсус кучлари пойтахт Бишкек ва Ўш вилоятининг Ўзган туманида исломий жангариларга қарши янги амалиётлар амалга оширгани ҳақида хабар берганлар.

Қирғизистон Давлат Миллий Хавфсизлик қўмитасига кўра, Бишкек шаҳрида уч шахс ҳибсга олинган.

Улар Ўзгандаги махсус амалиёт пайтида ўлдирилган қуроллиларнинг шериги дея гумон этилмоқда.

Ўзгандаги Қўшқўрғон қишлоғи атрофида эса яна бир жангари ўлдирилгани ҳақида хабар қилишган Қирғизистон Ички ишлар вазирлигидан.

Матбуот хизматига кўра, Бишкек шаҳрида асли Қирғизистонда туғилган Россия фуқароси ҳибсга олинган, унинг ёнида жанговор граната ва экстремистик мазмундаги аудио ёзувлар топилган.

"У Қирғизистон жанубида олдинроқ йўқ қилинган қуроллиларнинг шериги ва халқаро террористик ташкилотнинг аъзоси бўлиши мумкин"лигини айтган Давлат Миллий Хавфсизлик қўмитаси.

Қўлга олинган шахснинг Покистонда ҳарбий тайёргарликдан ўтгани ва Қирғизистонга халқаро терорчилик гуруҳининг бошқа аъзолари учун шароит яратиш ва ҳужжатлар тайёрлаш мақсадида келгани айтилган.

Хавфсизлик қўмитаси яна икки шахснинг ҳибсга олингани ҳақида маълум қилган, улардан бирининг "халқаро террорчилик гуруҳи аъзоларини хориждан мамлакатга олиб кириш" билан шуғуллангани, иккинчиси уларни сохта Қирғизистон паспортлари билан таъминлагани ҳақида айтилган.

Давлат Миллий Хавфсизлик қўмитаси ушбу ҳодиса бўйича жиноий иш қўзғатган.

Ҳибсга олинганларнинг шахсияти тергов манфаатлари учун дея эълон қилинмаган.

Мамлакат жанубидаги Ўш вилояти Ички ишлар идораси эса Ўзган тумани Қўшқўрғон қишлоғи атрофидаги кунгабоқар даласида яна бир жангари ўлдирилгани ҳақида хабар берганлар.

Милиция ходимлари бир кун илгари ўлдирилган уч жангари дастакловчилари ҳақида маълумот тўплаш мақсадида қишлоқ атрофини текшириб юришганида қуролли шахс уларга қарата ўт очишни бошлагани, граната ирғитгани хабар қилинмоқда.

Бир зобит яраланган, отишмада қуролли ўлдирилган.

Қирғизистон Давлат Миллий Хавфсизлик қўмитаси 27 июн куни Қўшқўрғон қишлоғидаги эгасиз уйлардан бирида жойлашиб олгани айтилган уч нафар қуроллининг ўлдирилганини айтган эди.

Расмийларга кўра, жангарилар таслим бўлишдан бош тортишлари ортидан махсус амалиёт бошланган.

Ўлдирилган жангариларнинг "Исломий Жиҳод" гуруҳига мансуб экани даъво қилинган.