Қирғизистон ўз сув омборидаги сувни оқизиш эвазига электр қуввати ишлаб чиқаради

Қирғизистон Саноат, энергетика ва ёқилғи заҳиралари вазири Иляс Давидовнинг айтишича, Қозоғистонга электр қуввати ёки амалда суғориш суви кўпроқ ҳажмда берилади.

Ўзбекистон томони ҳукуматлараро келишувда кўзда тутилган экинларни суғориш пайтида электр қувватини узатиш эвазига сув сақлаш шартномасини шу пайтгача имзолагани йўқ. Шунинг учун Қирғизистон ва Қозоғистон қўшимча 250-300 миллион киловатт соат электр энергиясини етказиш бўйича шартнома имзолаган, деб айтган Бишкекдаги матбуот анжуманида Қирғизистон Энергетика вазири.

Бу Ўзбекистонга экинларни суғориш учун сув камроқ узатилишини англатади.

Матбуот анжуманида мухбиримиз Қирғизистон Саноат, энергетика ва ёқилғи заҳиралари вазири Иляс Давидовга, Ўзбекистонга сув кам берилиши қиш ойларида ўзбек томонидан табиий газни сотиб олишда Қирғизистон муаммоларга дуч келмайдими, дея сўраган.

"Мен ўзбек томони табиий газни чеклаш бўйича бирор бир чора кўради, деб ўйламайман. Чунки бундай чеклаш электр энергиясини кўпроқ ишлаб чиқариш мақсадида қишки даврда Тўқтоғул омборидан сувни кўпроқ оқизишга олиб келади. Лекин ортидан баҳор келиши билан экинларни суғорадиган даврда қўшнилар сувга муҳтож бўладилар. Биз Ўзбекистон томони билан маълум бир ҳажмда олдиндан газ сотиб олиш бўйича тўғрисида келишиб олганмиз. Қирғизистон ўз вақтида маблағни берса, шу маблағ эвазига Ўзбекистон газни муаммосиз беради", деб айтди Қирғизистон Энергетика вазири.

Шўролар Иттифоқи даврида Қирғизистондаги Тўқтоғул омбори аввало сув заҳираларини Ўзбекистон ва Қозоғистон учун суғориш сувини сақлаш ва ундан кейин Қирғизистон учун электр қувватини ишлаб чиқариш мақсадида барпо этилган.

Бироқ охирги йилларда ушбу икки мақсад бир-бирига зид келаётгани кўзга ташланади.

Чунки айниқса қиш ойларида электр энергиясига муҳтож бўлган Қирғизистон сувни оқизиб юборса, баҳор-ёз мавсумларида Ўзбекистон ва Қозоғистон сувсиз қолиши мумкинлиги айтилади.

Шўролар даврида ўз омборида сув заҳирасини йиғаётгани учун қўшнилари Қирғизистонни ёқилғи ва электр қуввати билан таъминлаб келганлар.