Тоҳир Йўлдош беш йил муқаддат тарқатилган тарғибот фильмда кўриниши

Ўзбекистон Исломий Ҳаракатининг раҳбари Тоҳир Йўлдош ҳаракатининг май ойи охирида Андижон вилоятида содир этилан ҳужумларга алоқаси йўқлигини айтган.

Тоҳир Йўлдош ушбу баёноти унинг Покистон, Афғонистон, Хитой ва Марказий Осиёда бўлаётган ҳодисаларга ўз муносабатини билдириши чоғида янграган.

bbcuzbek.com саҳифаси умумий хатлар бўлимига йўлланган аудиомурожаатни Ўзбекистон Исломий Ҳаракатининг раҳбари Қуръон оятларини қироат қилиш ва жиҳодга даъватлар билан бошлайди.

“Иззат карвони”

Тоҳир Йўлдошга кўра, Ўзбекистон Исломий Ҳаракати жангчилари Покистоннинг Сват водийсидан бошланиб, шимолий ва жанубий Вазиристонга қадар бўлган минтақаларда Покистондаги Толибон ҳаракати раҳбари Байтуллоҳ Маҳсуд билан бирга “елкама-елка туриб ўз жиҳодини давом эттирмоқда”.

Унинг айтишича, Покистон армияси “ҳар кун, ҳар соатда ўз мағлубиятини тан олиш мажбуриятида қолаяпти”.

Ўтган ой Покистон армияси мулозимлари Ўзбекистон Исломий Ҳаракати раҳбари оғир яраланганини даъво қилишганди.

Аммо аудиомурожаатда Тоҳир Йўлдош сўнги кунларда юз берган воқеалар ҳақида гапиради.

Афғонистон жанубидаги исёнчилик ҳаракати мамлакат шимолига “ҳам кўчиб ўтди”, деб айтган Тоҳир Йўлдош.

Унинг даъво қилишича, Ўзбекистон Исломий Ҳаракати Афғонистон шимолида ҳам исёнчиликнинг илк сафида турибди.

Афғонистон ва Покистондаги қаршилик ҳаракатини “иззат карвони” дея таърифлаган Тоҳир Йўлдош мусулмонларни айни мужодалага қўшилишга чақирган.

Шунингдек, у Покистон ва Афғонистонда Исломий Халифалик қуриш учун “барча шарт-шароитлар” тайёр бўлганини айтган.

“Исломий Хилофатсиз ҳаёт – боши бўлмаган жасад,” деган Тоҳир Йўлдош.

“Зулмга биз бефарқ эмасмиз”

Ўзбекистон Исломий Ҳарактининг раҳбари Хитойнинг Шинжон Уйғур мухтор ҳудудида юз бераётган воқеаларга ҳам тўхталиб ўтган.

Исломий Хилофатсиз ҳаёт – боши бўлмаган жасад   Тоҳир Йўлдош

Шинжон Уйғур мухтор ҳудудини “Ислом умматининг ажралмас бир қисми,” деб атаган Тоҳир Йўлдош “у ердаги мусулмонларга бўлаётган зулмга биз бефарқ эмасмиз ва бефарқ бўла олмаймиз,” дейди.

У дунёнинг қурдартли давлатларини Хитойда юз бераётган зўравонликларга “бефарқ” бўлишда айблаган.

“Тижорий жамоат эмасмиз”

Тоҳир Йўлдош Ўзбекистон Исломий Ҳаракатининг май ойи охирида Андижон вилоятида юз берган қонли ҳодисаларга алоқаси йўқлигини айтган.

Ўзбекистон ҳукумати 25 майдан 26 майга ўтар кечаси Хонобод шаҳри яқинидаги милиция постига уч қуролли шахс томонидан ҳужум уюштирилганини маълум қилганди.

26 май куни Андижон шаҳрида содир этилган худкуш бомба ҳужуми оқибатида эса бир полиция зобити ҳалок бўлгани ва яна бир неча одам яралангани билдирилганди.

“Бир марта-икки марта портлатиб қўйиб, кимларнингдир буйруғини бажарадиган тижорий жамоат эмасмиз,” деб айтган Тоҳир Йўлдош.

Ўзбекистон мазкур ҳужумларда расман ҳеч қайси гуруҳни айбламаган, аммо интернетда "Исломий Жиҳод" гуруҳи номидан тарқатилган баёнот пайдо бўлган эди.