Робия Қодир Хитойдаги уйғурлар ҳуқуқлари учун курашади

Уйғурлар ҳақидаги ҳужжатли фильм шундоқ ҳам яхши бўлмаган Хитой ва Австралия ўртасидаги муносабатлар янада совуқлашишига туртки бўлди.

Мельбурн Халқаро Фильм фестивали ташкилотчилари айтишларича, Хитой расмийлари уйғур ишбилармон аёли Робия Қодир ҳақидаги фильмни фестивал рўйхатидан олиб ташлашни талаб қилганлар.

Расмий Пекин Шинжон Уйғур мухтор бўлгасида рўй берган миллатларо ғаларёнларни уюштиришда Жаҳон Уйғурлари Конгрессининг муҳожиротдаги раҳбари Робия Қодирни айблади.

"Муҳаббатнинг 10 шарти" деб номланган ҳужжатли фильм Робия Қодирга бағишланади.

11 фарзанднинг онаси Робия Қодир Хитойдаги энг муваффақиятли тадбиркор аёл эди. Ишбилармон аёл сиёсий маҳбусга айланди, сиёсий маҳбусликдан сўнг мамлакатни тарк этиб, Жаҳон Уйғурлари Конгрессининг раҳбари бўлди.

Ҳужжатли фильмда уйғур аёлининг ҳаёт йўли ҳикоя қилиб берилади.

Фильмда Робия Қодирнинг мустақил ватани учун кураши, фаол турмуш ўртоғи билан муносабатларининг синовга тутилиши ва буларнинг уни Хитойни ташлаб чиқишга мажбурлаб, фарзандлари ҳаётида қандай акс этгани тасвирланади.

Ҳозир унинг уч фарзанди ҳибсда.

Фильмда Қодир хоним курашини тўхтатмаслиги ҳақида гапиради.

"Хитой ҳукумати мен ҳозир қилаётган ишларимни ҳеч қачон тўхтатмаслигимни жуда яхши билади. Улар болаларимни ушлаб туришгани мени ҳозир қилаётган ишимдан тўхтатолмайди", дейди у.

Пекин уйғурлар раҳбарини 5 июл куни Урумчида юз берган, 180 дан зиёд инсон умрига зомин бўлган этник ҳанлар ва уйғурлар ўртасидаги тўқнашувларни ташкиллаштиришда айблайди.

Мельбурндаги Хитойнинг Маданият ишлари бўйича атташеси Мельбурн Халқаро Фильм фестивали ташкилотчиларидан "Муҳаббатнинг 10 шарти" фильмини фестиваль кун тартибидан туширишни талаб қилган.

Сўров кескин рад этилган.

"Муҳаббатнинг 10 шарти" фильми режиссёри Жефф Дэниелснинг айтишича, Хитой расмийлари бу билан Робия Қодирга бирор бир матбуот минбари берилишига қарши эканликларини аниқ билдиришни истайдилар.

"Қодир хонимнинг гапириши ва ўз қарашларини ифода этиши учун бирор бир имконият бермаслик - бу Хитой ҳукумати интилаётган нарса. Қодир хоним бунга Хитойнинг ўзида ҳаракат қилган ва уни олти йилга озодликдан маҳрум этишганди", дейди Жефф Дэниелс.

Хитойнинг энг бой аёлларидан бўлган Робия Қодир ҳозир АҚШда яшайди.

У Хитойнинг ўзига билдираётган айбловларини рад этади.

Сўнгги дипломатик жанжал Хитой билан Австралия ўртасидаги шу пайтгача ҳам таранг бўлиб келган муносабатларни янада ёмонлаштирди.

Шу кунларда Австралиянинг Бош вазири Кевин Руд Хитойни австралиялик кончилик ширкати раҳбари Стерн Ху иши борасида огоҳлантириш билан чиқди.

Жаноб Руд бутун дунё Стерн Ху билан боғлиқ вазиятни кузатиб турипти, деб айтган.