| Тошкентлик таниқли имом 'силга чалинган'
 |
|
| Ўзбекистон қамоқхоналарида диндор маҳбусларга муносабат ўта ёмонлиги айтилади |
Навои
вилоятидаги Қизилтепа шаҳридаги қамоқхонада сақланаётган Тошкентлик
таниқли имом Руҳиддин Фахруддинов сил касалига чалинган.
Бу ҳақда Би-би-си билан суҳбатда имомнинг турмуш ўртоғи Муҳайё Фахруддинова маълум қилган.
Унинг
айтишича, сил касалига чалинган турмуш ўртоғи Тошкентдаги "Сангород"
номи билан билинган маҳбуслар шифохонасига ётқизилган.
Муҳайё Фахруддинованинг айтишича, Руҳиддин ўтган йилнинг ўзида "тўққиз ой" давомида қамоқхона қарцерида сақланган.
Муҳайё турмуш ўртоғининг айнан шу даврда сил касалига чалинган бўлиши мумкинлигини тахмин қилади.
Тошкентдаги "Хожа Нуриддин" масжиди имоми Руҳиддин Фахруддинов 1998 йил бошидан Ўзбекистон ҳуқуқ-тартибот органлари томонидан
қидирувда бўлган.
Ўзбекистон куч тизимлари уни Ўзбекистондаги "ваҳҳобийлик оқими"нинг раҳбарларидан бири сифатида кўрганлар ва "Ўзбекистон Исломий
Ҳаракати" билан алоқада бўлганликда айблаганлар.
Руҳиддин Фахруддинов 2005 йил ноябрида Қозоғистон жанубидаги Чимкент шаҳрида Қозоғистон Миллий Хавфсизлик Қўмитаси ходимлари
томонидан қўлга олинган ва
махфий равишда Ўзбекистон хавфсизлик кучлари ихтиёрига топширилган эди.
Тошкент шаҳар суди уни "терроризм, қўпорувчилик, конституцион тузумга тажовуз қилиш дохил Ўзбекистон жиноий кодексининг 10
моддаси билан айблаб, 17 йилга озодликдан маҳрум этганди.
| 
