| ОХҲТ қирғиз журналистининг ўлими текширилишига даъват қилди
Оврўпода Хавфсизлик ва Ҳамкорлик ташкилотининг матбуот эркинлиги бўйича вакили Миклош Харашти Қирғизистон ташқи ишлар вазирига
мактуб йуллаб, журналист Алмаз Ташиевнинг ўлими юзасидан ҳар томонлама текширув олиб боришга чақирди.
Журналист Алмаз Ташиевнинг ўлими малакатдаги журналистларнинг хавфсизлиги борасида хавотирларга сабаб бўлган. Ташиев шу йилнинг
ўзида зўравонлик қурбони бўлган олтинчи журналистдир.
Би-би-си билан суҳбатда жаноб Харашти Алмаз Ташиевнинг ўлимига милиция ходими алоқадор эканлиги ҳақидаги хабарлардан ташвишда
эканлигини билдирди.
Миклош Харашти:
Жаноб Ташиевнинг ўлими борасида ҳали ҳамма нарса ойдин эмас. Бу
расмийлар айтаётганидек, журналистнинг фаолиятига алоқаси бўлмаган
қотиллик ҳам бўлиши мумкин, аммо Қиргизистонда шу йилнинг ўзида олтинчи
журналистнинг ўлдирилиши ва хусусан, охирги ҳодисада журналистни
ўлдирганини тан олган шахснинг милиция ходими экани жуда ҳам
ташвишлидир. Бу фақат халкаро жамоатчиликни эмас, балки Қирғизистон
расмийларини ҳам ташвишлантириши керак.
Би-би-си: Қирғизистон аъзоси бўлган Оврўпода Хавфсизлик ва Ҳамкорлик ташкилотининг матбуот вакили сифатида сиз нима қилишингиз мумкин?
Миклош Харашти:
Мен ишонаманки, Қирғизистон ҳукумати Оврупода Хавфсизлик ва Ҳамкорлик
ташкилотига аъзоликни жиддий қабул қилади. Қирғизистон ташкилотда
иштирок этаётган бошқа 55 давлат қатори сўз эркинлиги, матбуот
эркинлиги ва журналистларнинг хавфсизликлари билан боғлик
мажбуриятларга жиддий ёндошиши керак, деб ишонаман. Гарчи мен
ташкилотнинг матбуот вакили сифатида реал қудратга эга бўлмасам ҳам,
бизнинг огоҳлантиришимизни қирғиз ҳукумати жиддий қабул қилди, деб
ишонаман. Биз аввалги ҳодисаларда ҳам, жумладан, жаноб Абдилдаев,
Бобоқулов ва Агеева хоним сингари журналистларга ҳужумларда ҳам шу каби
огоҳлантиришлар билан чиққандик. Бу жарналистларга қарши ҳужумлар
шунчаки зўравонлик эмас, балки Қирғизистон демократиясининг муҳим
бўғинига қарши зўравонлик сифатида кўрилиши лозим. Умумият-ла,
Қирғизистон билан бизнинг ҳамкорлигимиз яхши. Бу йил биз Қирғизистонда
матбуотга бағишланган халқаро анжуман ўтказишни режалаганмиз. Умид
қиламанки, ҳамкорлигимиз журналистларнинг хавфсизлигини таъминлашда
аниқ натижаларни беради.
|
