Қирғизистонда
қатор ҳибслар амалга оширилди
Тўлқинбек
Турдибоев Би-би-си,
Бишкек
Қирғизистон ҳукуматининг
билдиришича, сўнгги пайтларда йигирмага яқин киши "террорчилик фаолиятига
алоқадорлик" гумони билан ҳибсга олинган.
Қирғиз Миллий хавфсизлик қўмитаси,
"қўлга олинганлардан 5 нафари хорижда тайёргарликдан ўтгани"ни маълум
қилган.
Бошқалари эса, Афғонистон ҳудудида
хорижий иттифоқ кучларига қарши жангларда иштирок этганликлари гумон
қилинмоқда.
Масъулларга кўра, уларнинг орасида
Ўзбекистон, Қирғизистон ва Қозоғистон фуқаролари бор.
Ҳибсдагиларнинг жанубий Жалолобод,
Ўш, шимолий Чўй вилоятлари ва пойтахт Бишкекда қўлга олинганликлари
айтилади.
Улар ҳозир Ўш шаҳри ва Бишкекдаги
хавфсизлик идораларининг қамоқхоналарида тутиб турилишибди.
Охирги бир неча ой давомида
Ўзбекистон, Тожикистон ва Қирғизистонда жангарилар фаолияти авж олгани
хабар қилинади.
Жумладан, 25 май куни Андижон
вилоятининг Хонобод шаҳрида милиция постига ҳужум қилинганди, бир ой
кейинроқ эса, Қирғизистон жанубида ўтказилган рейдларда исломий жангарилар
ўлдирилгани айтилганди.
Қирғизистонлик айрим масъуллар
сўнгги беқарорликларда, айниқса, Фарғона водийсидаги ишсизлик, сув ва ер
етишмовчилиги туфайли вужудга келган оғир иқтисодий ва ижтимоий аҳволнинг
таъсири катта эканини урғулашади.
Бошқа томондан, хорижий
иттифоқ кучларининг ҳарбий амалиётлари кучайиши натижасида аввал
Афғонистон ва Покистон ҳудудларида бўлган қуролли гуруҳлар аъзоларининг
бир қисми Марказий Осиё давлатлари, жумладан, Қирғизистон, Ўзбекистон ва
бошқа қўшни мамлакатларга ўтишга мажбур бўлаётганликлари айтилади.
|