20 июндан 21 июнга ўтар кечаси жаҳон бокс ишқибозлари Германиянинг 70
йиллик тарихида энг йирик бокс олишуви деб баҳоланган спорт
муштлашувини - ўзбекистонлик боксчи Руслан Чагаев билан украиналик
боксчи Владимир Кличко ўртасидаги яккама-якка жангни телеэкранларда
томоша қилишди. Германиянинг Гелзенкирхен шаҳрида шу олишув бўлиб ўтган
стадионнинг ўзига 61 минг томошабин тўпланди. “Мана, мен!” деган
зўрларни, жумладан сўнгги бор (2007 йил апрелида) жаҳон чемпиони,
ғолибликни ҳеч қўлдан бермаган рус боксчиси Николай Валуевни ҳам енган
боксчимиз бу гал таслим бўлди. Ушбу енгилиш Р.Чагаевнинг профессионал
бокс соҳасидаги биринчи мағлубиятидир. Лекин Жаҳон бокс ассоциацияси
(WBA) унинг В.Кличко билан учрашувига ижозат бермагани ва жанг WBA
бўйича кечмагани сабабли Руслан чемпионлик камаридан ҳали маҳрум
бўлгани йўқ.
Албатта, енгилиш муждаси ўзбекистонликлар учун
хушхабар эмас. Лекин уларни ўз юртдошларининг мағлубияти эмас, балки
йирик бокс жангидан бехабар қолганликлари ранжитди. Ахир биронта
маҳаллий газета, радио ёки телевидение канали (ҳатто “Спорт”
телеканали) жаҳоншумул мазкур мусобақа ҳақида ундан на аввал ва на
кейин ҳеч қандай хабар бермади-да. Тўғри, айримлар бундан Россиянинг
баъзи телеканаллари ахборотлари орқали воқиф бўлишди. Боз устига,
мусобақани жонли эфирда олиб кўрсатишни ўз дастурига киритган
Россиянинг ягона “Биринчи канали” ҳам сўнгги куни ниятидан воз кечди
(бу, ишончли тележурналистга кўра, Ўзбекистон ҳукуматининг босими
натижаси экан).
Ажабо, Ўзбекистоннинг Андижонида туғилиб
ўсган, оғир вазн тоифаси бўйича Осиё ва жаҳон чемпиони бўлароқ “Оқ
Тайсон” лақабини олган, Каримов режими томонидан “Ўзбекистон ифтихори”
фахрий унвони билан сийланган, татар миллатига мансуб 31 ёшли Руслан
Шамил ўғли Чагаев қандайин кабира гуноҳ қилдики, у режим учун энди
“нул” фуқарога айланди? Қарангки, ҳали ҳам ўзининг Ўзбекистон учун
“ифтихорман” деган сароб мулоҳазаси билан яшаётган Руслан мазкур
мусобақа олдидан берган интервьюсида, “12.uz” порталининг хабар
қилишича, жангни ютса, бу ютуғини ўз оиласи ва жонажон Ўзбекистонига
бағишлашини айтибди.
Киборлар доирасидан чиққан гапларга
қараганда, Руслан Ўзбекистон президентининг оиласига, хусусан унинг
қизи Гулнора Каримовага иснод келтирган эмиш. Бунга боксчининг никоҳ
билан тугамаган ва ўзидан 6 ёш катта бўлган Гулнора билан кечган ишқий
саргузашти сабаб бўлган. Дарҳақиқат, икки йилча муқаддам одамлар
ўртасида Руслан билан Гулноранинг тўйлари бўлиши ҳақида ҳам узунқулоқ
гаплар юриб қолган эди.
Хуллас, Чегаев энди ўз юртига қайтолмайди. Оиласи билан муҳожиротда - Германиянинг Гамбург шаҳрида яшашга мажбур.
ШАМС
Тошкент, 22 июн.
“Эрк” веб-сайти учун махсус