Самарқандда мухолифат фаолларининг учрашуви

“Ҳаракат” агентлигининг бугун тарқатган хабарида айтилишича Самарқанд шаҳрида йиғилган мухолифат фаоллари “Бирлик” ва Эрк партияларини расман тарқатилган деб эълон қилиб ўрнига “Бирлашган демократлар” партияси ёки ҳаракатини ташкил қилиш ташаббуси билан чиқишган. Айни ташаббус ортида кимлар ва қандай мақсадлар бор? Ҳақиқатдан Ўзбекистонда “Бирлашган демократлар” ташкилотини тузиш мавриди келдими? “Ҳаракат” саҳифасида бу ҳақда баҳс юритиш имконсизлиги боис хориждаги мухолифат вакиллари муносабатларини ўрганиш ниятида бу хабарни эълон қилишни мақсадга мувофиқ деб топдик.

Таҳририят.

Бугун Самарқанд шаҳрида “Бирлик” Партияси вилоят Кенгаши Ҳайъатнинг аъзолари Холиқназар Ғани, Абдумалик Умрзоқ ва «Эрк» демократик партияси вилоят раҳбарияти аъзолари С.Холбой, Б.Мавлондан иборат бир гуруҳ мухолифат фаолларининг учрашуви бўлиб ўтди. Учрашувда мухолифатдаги мавжуд аҳвол ҳақида фикр алмашилди. Мухолифатни бирлаштириш ва унинг баъзи йўллари муҳокама қилинди.

Хусусан, Бирлик” Партияси Самарқанд вилоят Кенгаши раиси Холиқназар Ғаниниг таклифи муҳокамага қўйилди. Таклифга кўра, мухолифатдаги ҳамма сиёсий партиялар ва ташкилотлар ўзларининг тегишли органларининг қарори билан ўз ташкилотларининг тарқатилганини расман эълон қилишлари, сўнгра, умумий ягона (Бирлашган демократлар) партияси ёки ҳаракатининг таъсис қурултойи чақирилиши керак. Бу таклиф йиғилиш қатнашчилари тарафидан маъқулланди.

Шуни алоҳида айтиш керакки, шу пайтгача кўпчилик мухолифатчилар мухолифат ташкилотларининг коалициион бирлашуви ҳақида гапиришарди, дейди мухбиримиз. Самарқандликларнинг таклифи улардан принципиал фарқли, айни замонда, конструктив. Улар ҳаммани бир ташкилотга бирлаштириш ҳақида гапирмоқдалар. Самарқандликларнинг бугунги таклифини муҳокама қилиш, ривожлантириш ва амалга ошириш - Ўзбекистонда демократияни олға суриш йўлида муҳим босқич бўларди.

“Ҳаракат” АА.