Ўзбекистон Инсон ҳуқуқлари жамияти адолатли бўлишга чақирияпти
Ўзбекистон
Инсон ҳуқуқлари жамияти мамлакат расмийлари томонидан ҳуқуқ ҳимоячилари
таъқиб этилаётгани ҳолатларига эътибор беришга чақирувчи навбатдаги
баёнотини ёйинлади.
Бу жамият тузилганидан бери (1992 йил 2 февраль) Ўзбекистон
расмийлари томонидан мунтазам таъқиб этилмоқда, дейилади баёнотда.
Жамият Ўзбекистон Адлия вазирлигига рўйхатдан ўтиш учун олти марта
ариза берган, аммо шунга қарамай рўйхатдан ўтмаган. Ўн етти йил
давомида жамиятнинг 28 нафар аъзоси сохталаштирилган айбловлар бўйича
судланди, 17 киши мамлакатни тарк этишга мажбур бўлди. Айни пайтда
жамиятнинг 9 нафар аъзоси озодликдан маҳрум этилган.
Жамиятнинг аъзолари Норбой Холжигитов, Аъзам Фармонов, Алишер
Кароматовлар адолатга хилоф тарзда узоқ муддатларга қамалдилар ва
уларга нисбатан қийноқлар қўлланмоқда. Шунингдек, шоир ва ҳуқуқ ҳимоячи
Юсуф Жума (“Саҳрои шерлар” ҳуқуқ ҳимоя жамияти) ва ҳуқуқ ҳимоячи Аъзам
Турғунов (“Мазлум” ҳуқуқ ҳимоя жамияти) ҳам қийноққа солинмоқда.
Жамиятнинг қамалмаган ёки мамлакатни тарк этмаган аъзолари МХХ ва
милиция ходимлари томонидан кузатув ва назорат остига олинганлар
(Баҳодир Намозов, Гулшан Қораева, Маъмир Азимов, Нодир Ахатов, Нурали
Кўлобов). Уларни милиция участкаларига, прокуратурага, маҳалла
қўмитасига сўроққа чақириб уй қамоғида сақламоқдалар ва чет эл
делегациялари, дипломатлар билан учрашишга ҳамда пикетларда иштирок
этишга ижозат бермаяптилар.
Баёнотда озодликдан маҳрум этилган ҳуқуқ ҳимоячиларининг рўйхати келтирилган.
Норбой Холжигитов, 1950 йилда туғилган, 10 йилга озодликдан маҳрум этилган, 2005 йил 4 июндан бери турмада.
Ҳабибулло Оқпўлатов, 1950 й.т. 2005 йил 4 июнь куни ҳибсга олинган, 6 йилга қамалган
Саттор Ирзоев, 2005 йил 4 июнь куни ҳибсга олинган, 6 йилга қамалган
Аъзам Фармонов, 1978 й.т. 2006 йилда 9 йилга озодликдан маҳрум этилган.
Алишер Кароматов, 1968 й.т. 2006 йилда 9 йилга озодликдан маҳрум этилган.
Насим Исоқов, 1966 й.т. 2005 йил 20 декабрь куни 8 йилга озодликдан маҳрум этилган.
Жамшид Каримов, мустақил журналист, Ислом Каримовнинг жияни, 2006 йилдан бери жиннихонада сақланмоқда.
Зафар Раҳимов, 2007 йил октябрида 6 йилга қамалган.
Йўлдош Расулов, 2007 йил апрель ойида ҳибсга олинган, 10 йилга қамалган.
Юсуф Жумаев, 1951 й.т. халқ шоири, “Саҳрои шерлар” жамиятидан. 2008 йил апрель ойида 5 йилга озодликдан маҳрум этилган.
Машраб Жумаев, “Саҳрои шерлар” жамиятидан, шоир Юсуф Жуманинг ўғли, 2008 йил 11 март куни 4 йилга озодликдан маҳрум этилган.
Абдурасул Худойназаров, 1956 й.т. “Эзгулик” жамиятидан, 2006 йилда 9,5 йилга озодликдан маҳрум этилган.
Солижон Абдураҳманов, 1950 й.т. журналист, 2008 йилда 10 йилга озодликдан маҳрум этилган.
Аъзам Турғунов, 1952 й.т. “Мазлум” ҳуқуқ ҳимоя жамиятининг раиси, 2008 йил кузида 10 йилга озодликдан маҳрум этилган.
Рўйхатга Ўзбекистон Инсон ҳуқуқлари бўйича мустақил ташкилотининг
Фарғона вилояти бўйича раиси Аҳмаджон Мадумаровнинг ўғиллари ва
жиянлари ҳам киритилган. Уларни А.Мадумаровнинг фаолияти учун жазо
сифатида қамаганлар ва қийноққа солганлар. Булар:
Мадумаров Абдулла, 1972 й.т.
Мадумаров Ҳабибулла, 1974 й.т.
Мадумаров Абдулаҳад, 1972 й.т.
Мадумаров Абдусамад, 1974 й.т.
Бу йигитлар диний эътиқоди ҳамда “Ҳизбут-таҳрир”га алоқадорликда гумонланиб қамалди.
Жамият Ўзбекистон расмийларининг ҳуқуқ ҳимоячиларини таъқиб этиши
Ўзбекистон Конститутцияси, Ўзбекистон 1995 йил 28 сентябрь куни
ратификация қилган Фуқаролик ва сиёсий ҳуқуқлар тўғрисида халқаро пакт,
БМТнинг ҳуқуқ ҳимоячилари тўғрисидаги Декларация ва бошқа бир қатор
халқаро ҳужжатларни қўпол равишда бузилиши эканлигига эътиборни
қаратмоқда.
Жамият ўзининг баёнотида Ўзбекистон расмийларини зудлик билан барча
ҳуқуқ ҳимоячиларини, шу жумладан, Аҳмаджон Мадумаровнинг ўғиллари ва
жиянларини, журналист Дилмурод Саййидни озод этишга; ҳуқуқ ҳимоячилари
қийноққа солинган, таҳқирланган, қўрқитилган ёки бошқача тарзда таъқиб
этилган барча ҳолатларини текширишга; маҳбусликда ўтирган ҳуқуқ
ҳимоячилари олдига қариндошлари ва адвокатларининг кира олишлари ҳамда
уларга тиббий ёрдам кўрсатишни таъминлашга; ҳуқуқ ҳимоячиларини
жиннихоналарга жойлаш амалиётини зудлик билан тўхтатишга; ҳуқуқ
ҳимоячилари эркин ва тўсиқларсиз ўз фаолиятларини юритишга шароит
яратиб беришга чақирди.
|