Мадраса қуришга изн бермаслик қарорига эътирозлар
Фил Мерсер
Сидней
Австралиянинг энг йирик шаҳри - Сиднейда юзлаб одамлар Исломий мадрасани қуриш режасининг ҳукумат томонидан бекор қилинишига
қарши норозилик намойишини ўтказдилар.
Мадрасада
илм олиш истагида бўлган болалар ва уларнинг ота-оналари ҳукумат
қарорини "адолатсиз ва ирқий камситиш" дея баҳолаганлар.
Исломий
гуруҳлар Австралиядаги нисбатан ёш ва тез ўсиб бораётган мусулмонлар
жамоасида диний таълимга зарурат борлигини таъкидлаб келадилар.
Сидней четидаги Басс Ҳил минтақасида 1200 талабага мўлжалланган Исломий мадрасани қуриш режалари сўнги дақиқаларда ҳукумат
томонидан бекор қилинган.
Мадрасани барпо этиш ишлари шу ҳафта бошланиши керак эди, бироқ ҳукумат бир неча йил муқаддам сотиб олинган ерни қайта сотиб
олиш қарорини олган.
Дарғазаб ота-оналар ва уларнинг фарзандлари маориф идораси ўнгида намйоиш ўтказиб, ҳукуматдан қурилиш режасини амалга оширишга
изн беришни талаб қилганлар.
Ҳукумат катта ҳатога йўл қўйди, дейди намйоиш ташкилотчиларидан бири Рафиқ Ҳусайн
"Биз
ҳукуматнинг бу қарорини тан олмаймиз. Бу Австралия қонунларига зиддир.
Бу, таъбири жоиз, австралиячилик асосларига зиддир; ҳамжиҳатлик ва
бирдамлик тамоили қайда қолди? Бу қарор бизни жуда ғазаблантирди. Бу -
адолатсиз қарор," - дейди Рафиқ Ҳусайн.
Баъзи намойишчилар мадраса қурилишига изн бермаслик қарори Австралияда диний тоқатсизлик ва ирқчилик мавжудлигини кўрсатади.
Исломий мадрасани қуриш режасини қўллаб қувватлаётганларга кўра, "маҳаллий аҳолининг шовқин-суроннинг кучайишидан хавотир
бўлаётгани" мадрасани қурмаслик қарорини олиш учун бир баҳона бўлди.
Ҳукумат расмийлари қарорни олишда "ирқ масаласи" умуман рол ўйнамаганини айтишади.
Ҳукумат мулозимлари Басс Ҳилл минтақасида мадраса қуришдан ҳам муҳимроқ эҳтиёж борлигини таъкидлайдилар.
Уларга кўра, ушбу минтақада қирққа яқин ногирон болага мўлжалланган махсус мактаб қуриш зарур.
Сидней атрофида ўндан зиёд Исломий мадрасалар мавжуд.
Исломий жамоалар раҳбарлари эса Австралиянинг тез суръатларда ўсаётган мусулмон аҳолиси учун диний мактабларни қуриш муҳимлигини
айтадилар
|