Жарқўрғонда мудҳиш қотилликШу
йилнинг 26 июлига ўтар кечаси Сурхондарё вилояти Жарқўрғон тумани
Янгибоғич кўчаси 13-уй 2-хонадонда мудҳиш ҳодиса рўй берди. Туманнинг
Каккайди қўрғонидаги 11506-ҳарбий қисм раздеткачи-сапёри Худойберди
Холмўминов беш нафар аёлни бўғизлади. Улар — Гулбаҳор Ҳасанова,
Кристина Никитина, Нилуфар Мустафоқулова, Дилфуза Қаршибоева ҳамда
Дилдора Бердиевалар эди. Аёлларнинг тўрт нафари воқеа жойида жон берди,
бешинчиси эса Жарқўрғон Марказий шифохонасининг реанимация бўлимида
ўлим билан олишмоқда.
Дастлабки суриштирув материалларига кўра, Худойберди 1981 йилнинг 18
сентябрида вилоятнинг Музработ туманида туғилган, икки сержантлик
мактабини битирган. Шу йилнинг октябрь ойида тўйи бўлиши керак эди.
Бироқ у ваҳшиёна қотилликда айбланиб, ҳибсга олинди. Қотиллик ҳолати ва
сабаблари аянчли: хонадонннинг 34 яшар соҳибаси Гулбаҳор Ҳасанова уйида
исловотхона (фоҳишахона) сақлаган. Бу гўшанинг доимий мижози бўлган
Худойберди эса танфурушлардан 300 000 сўм (170 АҚШ доллари атрофида —
Эзгулик) қарз бўлган. Ана шу қарзни талаб қилган Гулбаҳорни чавақлаган
аскар воқеа шоҳидлари бўлган енгилтак қизларни ҳам бир ёқли қилди.
Қўни-қўшниларнинг таъкидлашича, мазкур исловатхонадан маҳаллий
миршабларнинг ҳам, маҳалла фаолларининг ҳам яхшигина хабари бор эди.
Қолаверса, бу маскан аввалдан можаронинг уяси бўлганки, тарафлар
арзимаган чойчақа эвазига миршаблар билан тил топишиб кетарди.
Маҳаллада ярим йилдан бери оқсоқол бўлмай, туман ҳокимлигини бу масала
ортиқча безовта қилмаган. Оқибатда Жарқўрғонни ларзага келтирган ҳодиса
содир бўлди. Энди унинг овозаси анча жойгача эшитилса керак.
Ўзбекистон инсон ҳуқуқлари “Эзгулик” жамияти
|