Қирғизистонда мухолифат намойишлари
|
|
Қирғиз мухолифати сайловларнинг сохталаштирилганини айтмоқда |
Қирғизистон милицияси пойтахт Бишкекда президент сайловлари натижаларига қарши намойишга чиққан ўнлаб мухолифат тарафдорларини
ҳибсга олган.
Мухолифат раҳбарларидан Топчибек Турғуналиевнинг Би-би-сига айтишича, милиция пойтахт марказига қараб юришни бошлаган 40 нафар
намойишчини ҳибсга олган.
"Намойишчилар Бишкек четидаги бозорда тўпланиб, пойтахт марказидаги мухолифат қароргоҳигша қараб юришни бошлаган пайт ҳибсга
олинди", - деб айтди Бирлашган Халқ ҳаракати раҳбари жаноб Турғуналиев.
Мухолифат тарафдорлари овоз бериш натижаларининг сохталаштирилганини айтишмоқда.
Милиция намойишчиларнинг қўлларидан шиорларни тортиб олишга урингани ва ўртада тўқнашувлар юз бергани ҳақида хабарлар олинган.
Ўтган пайшанба бўлиб ўтган сайловларнинг расмий натижаларига кўра, амалдаги Президент Қурмонбек Бакиев 76 фоиз овоз олган,
мухолифат номзоди Алмазбек Атамбаев эса саккиз овоз тўплаган.
Оврўпода Хавфсизлик ва Ҳамкорлик Ташкилоти овоз бериш жараёнларида қонун бузилишлари, жумладан, бир сайловчининг бир неча
марта овоз бериш ҳоллари қайд этилганини айтган.
'Ўғирланган овозлар'
Бишкекдаги мухбиримизга кўра, мухолифат намойишлари Бишкек четида бошланган.
Намойишчилар Бишкек маркази, Президент саройига томон юришни режалаган эдилар.
Улар "Ўғирланган ҳокимиятни қайтар!" деган шиорларни кўтаришган.
Намойишчилар сонининг 100, баъзи хабарларда 200 га яқин бўлгани ва милиция уларни тезда тарқатиб юборгани айтилади.
Шоҳидларга кўра, ҳибсга олинган намойишчилар автобусларга ўтқазилиб, олиб кетилган.
Расмийлар намойишчиларнинг жаримага тортилишини айтишган.
Мухолифат бутун мамлакат бўйлаб норозилик чиқишларини режалаётганини айтган.
Мухолифат номзоди Алмазбек Атамбаев сайловларни "ноқонуний" деб атаган ва уларнинг натижаларини бекор қилишни талаб этган.
Расмийлар Жалолобод, Иссиқкўл ва Чуй вилоятларида ҳам мухолифат тарафдорларининг намойишлари ўтаётгани ҳақидаги хабарларни
рад этишган
|