Оязимхон Хидирова қишлоқ хўжалиги соҳасидаги носозликларни ёритиб келаётганди

Ўзбекистоннинг Жиззах вилоятида қамоққа олинган инсон ҳуқуқлари фаоли Оязимхон Хидирова уч кундурки очлик эълон қилган.

Фермерлик ва фермерлар ҳуқуқларини ҳимоя қилиш билан шуғулланиб келган фаолнинг адвокатига биноан, у безорилик ва солиқ тўлашдан бош тортиш айблари билан тергов давомида қамоқда ушлаб турилиши буюрилган.

Уч кундирки ҳибсхонада сақланаётган Хидирова хонимга бу ҳақида хабар қилинганда, у ҳушидан кетган. Унга тиббий ёрдам кўрсатиш учун тез ёрдам чақирилган, аммо уч кун давомида овқат ейишдан бош тортиб келаётган фаолга тиббий ёрдам кўрсатилмаётганди.

Хидирова хонимнинг уйи 29 июль куни тинтув қилинган. Ўзбекистон Инсон Ҳуқуқлари Халқаро Жамияти аъзоси Бахтиёр Ҳамроевнинг айтишича, ҳуқуқ-тартибот органлари ходимлари унинг уйидан қурол, наркотик моддалар, диний китоблар ва дисклар излашган.

Оязимхон Хидирова, жамияти раиси Зиёдулло Раззоқов сўзларига кўра, Ўзбекистонда бир неча ойдан бери амалга оширилаётган фермер хўжаликларини кенгайтириш, яъни 80 гектардан камроқ ерга эга фермерларнинг ерларини каттароқ фермаларга қўшиш борасидаги ҳукумат қарорининг амалга оширилишидаги қонунбузарликларни ёритиб келаётганди.

Унинг ўзи 50 гектар ерга эга фермаси давлат тасарруфига ўтиш ҳавфи остида қолгач, бошқа фермерлар билан ерини қўшиб, 70 гектарлик фермага бошчилик қилиб келаётганди.

Яқинда ўз ҳимоячилик фаолияти учун совхоз раҳбари лавозимидан четлатилгани айтилган Хидирова хоним, ҳамкасблари сўзига кўра, янги совхоз раҳбари билан ғаллани ўриш учун зарур бўлган комбайнларнинг ижараси борасида тортишувга борган.

Тортишув ортидан жароҳат олганини айтган совхоз раҳбари шикоятига биноан, фермел аёл безориликда айбланаяпти.

У бир неча бор Жиззах вилояти қишлоқ хўжалиги соҳаси раҳбарларининг гўёки амалга оширган жиноятлари борасида Ўзбекистон президенти, Бош прокуратура, Омбудсманига бир неча бор мурожаат қилган.

Бахтиёр Ҳамроевнинг айтишича, Ўзбекистон парламентига сайловлар олдидан инсон ҳуқуқлари фаолларига қарши босим ҳамда репрессиялар кучайтирилган.

Куни кеча Ўзбекистонда таниқли журналист ва инсон ҳуқуқлари ҳимоячиси Дилмурод Саййид 12 ярим йиллик қамоқ жазосига маҳкум этилган.

Маҳкама ҳукми унинг ҳимоячиси ва яқинларининг хабарисиз яширин равишда чиқарилган.

Самарқанд вилоят Тошлоқ туман маҳкамаси Дилмурод Саййидни таъмагирлик ва сохта ҳужжатларни тайёрлашда айбдор деб топган.