Медведев ва Раҳмон янги ГЭСни ишга туширдилар
|
|
"Сангтўда-1" ГЭСи Тожикистоннинг электр қувватига бўлган йиллик эҳтиёжининг 12 фоизини ишлаб чиқаради |
Россия Президенти Дмитрий Медведев ва Тожикистон Президенти Имомали Раҳмон "Сангтўда-1" гидроэлектр станциясининг расмий очилиш
маросимида қатнашдилар.
Президентлар
Медведев ҳамда Раҳмон биргаликда ГЭСнинг машина залида рамзий тугмани
босганлар, шундан сўнг "Сангтўда-1"да электр қувватини ишлаб чиқариш
бошлангани ва Тожикистоннинг қайси ҳудудларига электр узатиш
бошланганини кўрсатадиган харитадаги чироқлар ёнган.
"Сангтўда-1" ГЭСи Россия сармояси асосида барпо этилган иншоот бўлиб, унинг акцияларининг 75 фоизи Россияга тегишлидир.
ГЭС Бош директори Раҳматулло Алжоновнинг айтишича, қурилишга Россия томони 500 миллион АҚШ долларидан зиёд маблағ сарфлаган.
Раҳматулло Алжонов сув омборида икки ойдан сўнг етарли сув тўпланганидан кейин гидроэлектрстанция тўла қувват билан ишлай
бошлашини айтган.
Мутахассисларга кўра, "Сангтўда-1" йилига 2,7 миллиард киловатт электр ишлаб чиқара олади.
Бу Тожикистоннинг электр қувватига бўлган йиллик эҳтиёжининг 12 фоизи деганидир.
Пойтахт Душанбедан 160 километр жанубда Вахш дарёсида "Сангтўда-1" ГЭСини барпо этиш Шўролар даврида бошланган, бироқ тўхтаб
қолган эди.
Россиянинг молиявий кўмаги ва Россия ширкатлари иштирокида ГЭСни қайта қуриш ишлари 2005 йилда бошланган.
Айни
пайтда Тожикистон ўзининг электр қувватига бўлган эҳтиёжини қондириш
мақсадида яна иккита - "Сангтўда-2" ва "Роғун" гидроэлектр
станцияларини барпо этишни кўзламоқда.
Тожикистоннинг
бу режаларига қўшни Ўзбекистон қаршилик кўрсатиб келади, Ўзбекистон сув
оқими бошида жойлашган Тожикистон ва Қирғизистонда янги гидроэлектр
станциялар қурилиши минтақа экологиясига салбий таъсир кўрсатишини
айтиб келади.
Ушбу электр
ишлаб чиқариш иншоотининг ишга туширилиши Душанбе шаҳридаги Россия ва
Тожикистон президентлари учрашуви кун тартибидаги асосий масала
сифатида кўрилган.
30 июл куни Душанбеда Россия, Тожикистон, Афғонистон ва Покистон раҳбарлари учрашуви бўлиб ўтган.
|