Тошкентда диний арбобларга бу каби ҳужумлар бўлмаган

Тошкент шаҳрида 16 июл ва 31 июл кунлари икки диний мулозимнинг пичоқлангани қатор саволларни ўртага солган.

Июл ойининг ўртасида номаълум шахс "Кўкалдош" мадрасаси раҳбарининг маънавият ишлари бўйича ўринбосари Аброрхон Аброровни пичоқлагани оқибатида ҳаётдан кўз юмган.

31 июл куни тунда Тошкент шаҳрининг бош имом-хатиби Анвар қори Турсунов номаълум шахслар тарафидан пичоқлаб кетилганидан кейин оғир аҳволда шифохонага ётқизилган.

Яқинларининг Би-би-сига айтишларича, "Кўкалдош" мадрасаси директори ўринбосари Аброрхон Аброров Тошкентнинг Сирғали туманидаги уйи остонасида пичоқланган.

1972 йилда туғилган Аброрхон Аброров охирги уч йил мобайнида Тошкентдаги нуфузли диний ўқув юрти раҳбарларидан бири сифатида ишлаган.

У Ислом университетини битирган, Тошкентдаги Шарқшунослик институтида диншунослик бўйича сўнг Мисрдаги "Ал-Азҳар" университетида таҳсил олган.

Аброр Аброров ўзи туғилган Сурхондарё вилояти Бойсун туманининг Сайроб қишлоғида дафн этилган.

Хабарларга кўра, ҳужум қилинганидан кейин Анвар қори Турсунов бир неча кун ҳушсиз ётганидан сўнг ўзига келган.

Гувоҳлар Анвар қорига ҳужум қилганлар бир неча киши бўлгани ва автомобилда ҳодиса жойидан қочиб кетганлари ҳақида айтишган.

Анвар қори Турсунов Ўзбекистонда ҳукумат қўллайдиган расмий Ислом динининг энг кўзга кўринган вакилларидан бири.

Хусусан, сўнгги йиллари диний-сиёсий айблар билан ўтган кўплаб маҳкамаларда айблов ва давлат қоралов тарафи Анвар қори Турсуновнинг эксперт хулосаларига таяниб келган.

Ҳар иккала жиноят юзасидан расмий фаразлар ҳозирча илгари сурилмаган.

Бироқ айрим норасмий фаразларда гумон Ўзбекистонда фаолияти тақиқланган диний гуруҳларга тушаётгани айтилади.

Ўзбекистондаги "Узметроном" интернет саҳифаси, Тошкент шаҳрининг бош имом-хатибига ҳужумнинг асосий сабаби, "кўпчилик фикрича, диний арбоблар ўртасидаги тужжорий манфаатлар келишмовчилиги", деб ёзган.

Би-би-си ўзбекистонлик таниқли уламо Обидхон қори Назаров билан диний уламоларга ҳужумлар борасида суҳбатлашди.

Таниқли уламо Обидхон қори Назаров билан суҳбат