Жиззахда қуролли тўқнашув кечгани хабар қилинмоқда
|
|
Жиззахнинг тоғли Бахмал ҳудудлари қўшни Тожикистонга чегарадош |
Хабарларга кўра, Жиззах вилоятининг Тожикистонга туташ ҳудудида номаълум қуролли шахслар ва чегара кучлари ўртасида отишма
рўй берган.
Бу борада ёзаётган Central Asian News хабар агентлигига кўра, бир неча дақиқа давом этган мазкур тўқнашувда инсоний талофотлар
берилган.
Айни хабар ўта қисқа ва тафсилотсиз. Бироқ унда воқеа Қоровулбозор сув омбори яқинида бўлгани айтилади.
Бироқ сув омбори Қоровултепа, деб аталади ва Бахмалда эмас, балки Ғаллаоролда жойлашган. Мустақил манбалар ушбу сув омбори
ёнида ҳеч қандай қуролли воқеа рўй бермаган, дейишмоқда.
Би-би-си ўрганган маълумотларга кўра, қуролли тўқнашув Жиззах вилояти жанубидаги Бахмал хўжалигида рўй берган.
Шоҳидларга таянган манбага кўра, беш-олти нафар аёл у ерга гиёҳ териш баҳонасида келишган.
Кейинчалик бундан шубҳаланган чегара қўшинлари уларнинг олдига суриштириш учун келишганида, бир неча нафар қуролли шахс
уларга ҳужум қилган, дейилмоқда.
Натижада гўё 5-6 нафар зобит ҳалок бўлгани ва аёллар эса ҳибсга олингани айтилмоқда. Аммо қуролли эркаклар кимлар, уларга нима бўлган - маълум эмас.
Шунингдек, қайси давлат фуқароолари бўлишгани ҳам айтилмаган.
Айни дамда ушбу хабарларни расмийлар тарафидан тасдиқлатишнинг иложи бўлмади.
Манбалар, шунингдек, Бахмалга кириш ва у ердан чиқиш ҳозир бекитиб қўйилганини билдиришмоқда.
Лекин бутун воқеа каби, мазкур тафсилотлар ҳам тўла тасдиғини топганича йўқ.
Би-би-си Жиззах вилояти ҳокимлиги ва масъул идоралардан бу хабар
хусусида тафсилотларни сўраганда, вилоят ҳокимлиги вакиллари хабарни на
тасдиқлашган, на рад этганлар.
Бахмал Тожикистон чегарасига яқин ерда жойлашган. Ҳудуд тоғли. Жанубда Зарафшон дарёсининг Пенжикентдаги қисми оқиб ўтади.
Тафсилотлари номаълум қолаётган ушбу воқеани Марказий Осиёда сўнгги ҳафталар кузатилаётган бошқа зўравонлик ҳолларига боғлашга
эрта.
Аммо кейинги кунлари Тожикистоннинг тоғли шарқий қисмларида Ўзбекистон Исломий Ҳаракатининг бир неча нафар жангариси қўлга
олингани ва ё ўлдирилгани хусусида хабарлар чиқаяпти.
Олдинроқ
эса Ўзбекистоннинг Андижон вилоятида худкушлик ҳужуми содир этилиб,
Хонобод туманида милиция масканига ҳужум бўлганди.
Шундан кейин қўшни Қирғизистон жанубида, Ўзбекистонга ёндош бўлгаларида отишмалар ҳамда тўқнашувлар кечгани хабар берилди.
Қирғизистон расмийлари ҳам исломий жангариларни қўлга туширишгани ҳақида баёнотлар беришган.
|