Ирландияда жойлашган ҳуқуқ ҳимоячиларини ҳимоя қилувчи ташкилот, Front Line маълумотига кўра, Самарқанд вилояти Иштихон туманида яшаган, 2005 йили ўн йилга озодликдан маҳрум қилинган, Қарши УЯ 64/49 қамоқхонасида сақланаётган ҳуқуқ ҳимоячиси Норбой Холжигитовнинг аҳволи кескин ёмонлашган.

Ташкилот Холжигитовнинг аҳволи ҳақидаги маълумотни яқинда, қамоқхонага бориб келган ҳуқуқ ҳимоячисининг яқин қариндошларидан олди.

Уларнинг сўзларига кўра, қанд касали билан оғриётган бемор Холжигитов қонидаги қанд даражасини назорат қилиш учун керакли инсулин ёрдамини ололмаяпти, қанднинг кескин кўтарилиши ўзгалар ёрдамисиз, ҳаракатлана олмаслигида кўзга чалинмоқда.

«Унинг чап оёғи ва қўли ҳаракатланмай қолди», - дейилади Front Line хабарида.

Ташкилот ҳуқуқ ҳимоячисининг хотини Бўригул Холжигитова сўзларидан иқтибос келтиради, унинг айтишича, сўнгги учрашувда унинг эри олдингига нисбатан анча ёмон аҳволда кўринган. Унинг фақат битта тиши қолган, юзининг бир қисми ва оёғидаги иккита бармоғи қорайган. Бундан ташқари у депрессияга берилган.

Норбой Холжигитов, Ўзбекистон Инсон ҳуқуқлари жамияти (ЎИҲЖ) Иштихон туман бўлими раҳбари, 2005 йил 13 май қирғинидан кейин бутун мамлакат бўйлаб ҳуқуқ ҳимоячилари ва бошқа фуқаролик жамияти фаолларига қарши бошланган кампания пайтида ҳибсга олинган.

ЎИҲЖ раиси Абдужалил Бойматовнинг сўзларига кўра, Андижондаги қирғиндан кейин унинг ташкилотидан 17 аъзо хибсга олинган ва ҳукм қилинган, уларнинг бир қисми кейинчалик озодликка чиқарилган, бироқ яна тўққиз нафар унинг ҳамкасблари қамоқларда қолмоқда.

«Холжигитовни турмада сақлаётганларига сабаб, у Иштихонда жуда танилган эди, у қамалганида 400 нафарга яқин одам норозилик билдириб чиқди, ҳукумат унинг халқ орасидаги таъсиридан қўрқар эди.

Холжигитовнинг ҳуқуқ ҳимоясидаги фаолиятига, Бойматовнинг айтишича, Ўзбекистондаг вазият ва ҳаёт сабаб бўлган. Узоқ вақт совет даврида совхоз раиси бўлган шахс, янги мустақил Ўзбекистонни қувонч билан қаршилайди, эндиликдла фермер ва деҳқонлар ҳақиқий эркинликка эришади дея умид қилади.

«У Ислома Каримовнинг гапларини тинглаб, у нима деган бўлса ҳаммасини қилди, халқни ҳам шунга чақирди, бироқ ўша пайтда у президентнинг гапи билан иши бошқа бошқа эканлигини билмасди, мана энди у диссидент бўлиб ўтирибди», - дейди Бойматов.

Фермерлар ҳуқуқининг ҳимояси, ва уларнинг оғир аҳволи илк бор 2004-2005 йиллари чўққига чиқди ва мамлакатнинг турли худудларида оммавий норозиликларга сабаб бўлди, бу эса Холжигитовнинг қамоққа олиниши ва кескин ҳукм чиқарилишида рол ўйнади.

«Холжигитовни озодликка чиқариш керак, - у Ўзбекистон ватанпарвари, у ерни, ўз халқини севади, - дейди ўз ҳамкасби ҳақида Абдужалил Бойматов, - бундай инсонларни турмада чиритиш мумкин эмас, ўйлайманки, буни президент Каримов ҳам тушуниши керак».

Uznews.net