Стокҳолмда пикет бўлиб ўтди

Дилмурод, Швеция.

14 август куни Швециянинг Норрботен вилоятида яшовчи “Бирдамлик” ҳаракатининг тўрт нафар фаоли минг км.лик йўл босиб Стокҳолмга келишди. Улар АҚШнинг Швециядаги элчихонасини пикет қилиб “Озодлик” радиосидаги цензурани тўхтатишни талаб қилишни мақсад қилиб олишган эди.
Пикет Вашингтонда 10 август кунидан буён давом этиб келаётган очлик акцияси иштирокчиларини қўллаб қуватлаш ниятида ўтказилди. Акция иштирокчилари “Озодлик” радиосидаги тарафкашликка барҳам бериш, радионинг ўзбек бўлими раҳбари Сожида Жаъфарова ўрнига ўзбек тилини яхши биладиган, ўзбек мухолифати фаолиятидан яхши хабардор малакали журналистни тайинлаш, ака-ука Бобожоновларни радиодаги ҳукмронлигига барҳам бериш каби талаблар ёзилган шиорларни кўтариб олишган эди.

-Элчихона ёнида пикет ўтказишга рухсат беришмади. Шу сабабли биз элчихона рўпарасида-кўчани нариги томонида туриб пикетни бошладик. Бу кўчадан ўтаётган кишилар ва элчихона ходимлари учун кўринадиган жой эди, -дейди пикет ташкилотчиси, “Бирдамлик” ҳаракатининг шимолий Швеция бўйича раҳбари Георгий Морозов.

Пикет икки соат давом этган. Элчихонадан чиққан бир ходим пикетчиларга ўз талабларини ёзма равишда элчихонага тақдим этишлари шарт эканлиги ва бу талаблар албатта кўриб чиқилишини айтган.

Пикетдан сўнг “Бирдамлик” талаблари ёзма равишда элчихонага юборилган.

“Бирдамлик” ҳаракати фаолларининг Стокҳолмда бўлиб ўтган пикети ҳақида Ҳуқуқ Ҳимоячилари Халқаро Жамияти раиси Муҳиддин Қурбонов ўз фикрларини билдирди:

-”Озодлик” радиоси энг демократик радиодир. Радиони ҳамма ходимларини тарафкашликда айблаш тўғри эмас. Мен фақат радионинг бир ходими - Шуҳрат Бобожоновни тарафкашликда айблаган бўлардим. У радио орқали Муҳаммад Солиҳни обрўсини ошириш мақсадида бераётган мақолалари билан уни обрўсизлантираяпти холос,-дейди Муҳиддин Қурбонов.

М.Қурбоновнинг айтишичач, “Бирдамлик” ҳаракати ташкил қилган акциялар кўпчилик радиолар учун сабоқ бўлиши керак. Тарафкашлик, бирёқламалик албатта ҳеч кимга ёқмайди.

- Куни кеча “Озодлик” радиосининг Прагадаги офисида бўлганимизда ҳозирда вақтинчалик ўзбек бўлими раҳбари Алишер Сиддиқ билан бўлган ўзаро суҳбатни яхшилик аломати сифатида қабул қилдим. Шуҳрат Бобожонов билан суҳбат менда жуда ёмон таассурот қолдирди. Мен ундан  нега радиода тарафкашликка йўл қўяётгани ҳақида сўрасам, у “буни сизга нима қизиғи бор?” дея жавоб берди. Радиони юқори мартабали ходими ҳам ана шундай “сенга нима” қабилида иш юритадиган бўлса, бундан кейин албатта норозиликлар келиб чиқаверади. Нима бўлгнада ҳам радио раҳбариятида Бобожоновлар ҳақида етарли тасаввур пайдо бўлди. Бизни вазифамиз ваъда қилинганидек бундан кейин радиода бўладиган ўзгаришларни кузатиш, -дейди Муҳиддин Қурбонов.