Сиёсий маҳбус Мурод Жўраев сил касаллигига чалинган
Нодир Ахатов, Қарши шаҳри.
11июль куни отасини кўргани борган Мурод Жўраевнинг катта ўғли уни
жазони ўташ жойидан топа олмаган. Зонадаги масъул кишилар Мурод
Жўраевни Каттақўрғондаги маҳбуслар касалхонасига ўтказилгани ҳақида
хабар беришган.
14 августда Каттуқўрғонга отасини қидириб борган ўғилга отаси Мурод
Жўраевни Тошкентдаги Тоштурма номи билан машҳур касалхонага
юборилганини айтишган.
Тошкентга отасини қидириб борган ўғил у ердан ҳам Мурод Жўраевни топа олмаган.
Шундай қилиб сиёсий маҳбус Мурод Жўраев сирли равишда йўқолди.Уни
топиш учун оила аъзолари барча идораларнинг эшигини бирма-бир
тақиллатиб, қидириб юришибди.
“Бирдамлик” ҳаракати ва Ўзбекистон Инсон Ҳуқуқлари Жамиятининг
Қашқадарё вилоят бўлими Мурод Жўраевнинг ҳаёти юзасидан ўз ташвишларини
билдиради.
Мурод Жўраев ҳозир қаерда? Унга нима бўлди?
Шу муносабат билан биз Ўзбекистон Президенти Ислом Каримовга мактуб
йўллаб, Мурод Жўраевни қамоқдан озод этилишига ёрдам беришини илтимос
қилдик.
Қуйида мактуб матни билан танишинг.
****
Ўзбекистон Президенти Ислом Абдуғаниевич Каримовга!
Ислом Абдуғаниевич!
Бу йил сиёсий маҳбус Мурод Жўраевнинг қамалганлигига 16 йил
тўлди. 60 ёшга тўлган маҳбус бугунги кунда юқумли сил касалига
чалинган, ниҳоятда ҳолдан тойган. У касаллиги туфайли жуда оғир ҳаракат
қилади. Бирор кун йўқки тиббий ёрдамга муҳтож бўлмаса.
Шундай хаста одамнинг жазони ўташ муассасаси тартиб - қоидасини
бузди, деб унга белгиланган жазо муддатига асоссиз равишда қўшимча
муҳлат қўшиб берилиши ҳеч қандай мантиққа тўғри келмайди. Бу
одамгарчилик, инсонпарварликнинг ҳар қандай қолипига сиғмайдиган
ҳаракатдир.
Суд қароридан ташқари яна муҳлат қўшиб бериш бу буюртма бўйича
бажарилган иш эканлигини нафақат Ўзбекистонликлар, балки халқаро
ташкилотлар ҳам яхши тушуниб туришибди.
Ислом Абдуғаниевич!
Сизга бир савол беришга рухсат берсангиз.Сиз шу йиллар давомида
давлат буғимларининг барча жабҳаларини ўз назоратингизга олишга
эришдингиз. Шу билан биргаликда армия, милиция, суд, прокуратура,
миллий хавфсизлик - умуман барча куч ишлатар ва қонун чиқарувчи
идораларнинг барча тизгини сизнинг қўлингиздадир. Шундай қудратга эга
бўлган сиздек одамга 60 ёшга кириб сил касалига чалинган, ҳеч қандай
қуролга, молиявий қудратга эга бўлмаган, бор бойлиги оиласидан иборат
бўлган касал одам қандай хавф солиши мумкин?
Қанчадан - қанча одам ўлдирган, наркотик сотган ва бошқа оғир
жиноят қилиб узоқ муддатга қамалган муттаҳамлар озод бўлаяпти. Уларга
сизнинг раҳм - шафқат, ниёзингиз етганида, наҳотки шу биргина одамга
етмай қолди!. Ахир 90-йиллар бошида нафақат Мурод Жўраев, балки бутун
иттифоқ одамлари мўлжалларини йўқотиб қўйишганди. Сабаби маълум - у
даврда анархия ҳукмрон эди.
Шу сабаб бир инсоннинг тақдирига эътиборсиз бўлмаслигингизни ва
Мурод Жўраевни жорий йил мустақиллик байрами ва Тошкентнинг юбилей
йилига мулжаллаб эълон килиниши режалаштирилаётган авфномага биноан уни
озод этиб, ўз оиласи бағрига қайтишига амалий ёрдам беришингизни
илтимос қиламиз.
Ҳурмат билан Нодир Ахатов,
“Бирдамлик”ҳаракати,
“Ўзбекистон Инсон Ҳуқуқлари Жамияти.
17 августь 2009 йил.
|