 | Оязимхон Хидирова
|
Фаол фермердан ашаддий жиноятчига айлантирилди 26.08.09
— Жиззах вилоят Арнасой туман милиция бўлими фермер ва ҳуқуқ ҳимоячиси
Оязимхон Хидирова иши юзасидан терговни якунлади ва аёлга Жиноят
кодексининг 13 та моддаси бўйича айблов илгари сурилди.
22 август куни Жиззах вилоят Арнасой тумана ТИИБ терговчилари июлнинг
охирида ҳибсга олинган жиззахлик фаол Оязимхон Хидирова ишини унинг
ҳимоячилари ва яқинларини саросимага солувчи тергов ҳулосалари билан
эълон қилди.
Унга нисбатан Жиноят кодексининг 13 та моддаси, жумладан: 168 -
«Товламачилик», 184 - «Солиқ ва бошқа тўловлардан бўйин товлаш», 277
модда 2 ва 3 қисми - «Безорилик», 228 - «Ҳужжатларни қалбакилаштириш»,
166 - «Ўғирлик» ва 167 - «Талон тарож ёки камомад орқали ўзлаштириш» ва
бошқалар.
Тергов якунланиши билан, 22 августда Хидирова қўшни Сирдарё вилоятига
этап қилинди, у ерда уни Ховос туман вақтинчалик сақлаш ҳибсхонасига
жойлаштиришди.
Хидированинг яқинларига кўра, бошқа турмага ўтказишларидан олдин у
терговчидан, иккита кичик боласи билан учрашувга руҳсат сўраган, бироқ
улар оддий ва ҳар қандай инсонга тушунарли бўлган шу илтимосни ҳам рад
этишган.
Якшанба куни, 23 августда, Хидированинг эри Хавос туманига, унга тоза
нарсаларини киритиб бериш учун боради, бироқ соқчилар ва қамоқхона
бошлиқлари унинг учрашишига руҳсат этишмайди, уларга кўра, 1 сентябр
куни Ўзбекистонда нишонланадиган Мустақиллик кунигача маҳкумлар билан
ҳар қандай учрашувлар бекор қилинган.
Оязимхон Хидирова 28 июл куни ҳибсга олинган эди. Ҳимоячиларига кўра,
унинг қамоққа олинишига маҳаллий бюрократлар ва коррупционерларга қарши
олиб борган кураши сабаб бўлган.
Жиззах вилоят қишлоқ хўжалигидаги муаммолар ҳақида у президент Ислом
Каримовга мактуб ёзган, айрим жиззахликликларнинг фикрига кўра, айнан
ушбу мактуб унинг кўргиликларига сабаб бўлган.
Ҳимоячиларининг гувоҳлик билдиришича, Арнасой ТИИВдаги суриштирув бир
қатор қонунбузарликлар билан ўтган. Терговчилар доим бақиришган, аёлни
ҳақорат қилиб, унинг ҳаёти уларга уч пул экани, унга хохлаган ишларини
қилишлари мумкинлигини айтиб хўрлашган.
Ҳимоячиларидан бирининг айтишича, Хидировага қарши айбловлар ўта
очиқчасига «тўқилган», унинг олдига нотаниш одамларни бошлаб келиб, уни
ҳужжатларни қалбакилаштириш, улар ишлаб топган даромадни ўзлаштириш
каби жинояларда айблашган.
Uznews.ne
|
