Молдова пойтахти Кишинёвда МДҲ раҳбарлари йиғилмоқдалар, ушбу саммитда Ўзбекистон, Қозоғистон, Тожикистон ва Туркманистон президентларининг қатнашмаслиги маълум қилинган.

Молдова Ташқи ишлар вазирлиги расмий вакилининг билдиришича, ушбу учрашувга Мустақил Давлатлар Ҳамдўстлигига аъзо 11 республиканинг барча ташқи ишлар вазирлари иштирок этишади.

Давлат раҳбарларидан тўрт нафари Кишинёвга бормайдиган бўлганлар.

Би-би-си мухбирининг ёзишича, Тожикистон ва Туркманистон президентлари Имомали Раҳмон ва Гурбангули Бердимуҳамедовлар бу пайтда Душанбе шаҳрида икки томонлама учрашув ўтказишни маъқул кўришган. Жаноб Раҳмоннинг матбуот хизмати "бунинг бирор бир сиёсий сабаби йўқ"лиги ҳақидаги баёнот билан чекланган.

Қозоғистон ва Ўзбекистон раҳбарлари Нурсултон Назарбоев ҳамда Ислом Каримовлар саммитни сабабларини тушунтирмасдан рад этишган. Жаноб Каримовнинг бундай қарори оддий ҳол ҳисобланса, Нурсултон Назарбоевнинг саммитга бормайдиган бўлгани кўпчиликни ҳайрон қолдирди. Бу кунларда Остонада бирор бир муҳим расмий тадбир режалаштирилгани ҳақида хабар қилинмаган.

Кишинёвда Қозоғистон ва Тожикистон номидан бош вазирлар даврада иштирок этишади, Туркманистондан бош вазир ўринбосарларидан бири, Ўзбекистонни эса балки Молдовадаги элчиси тақдим этар, дея хабар қилади Би-би-си мухбири.

Москва тўрт раҳбарнинг иштирок этмаётганидан "ваҳима ясамоқчи эмас".

"Россия президенти саммитда кимлар иштирок этишидан бохабар, у саммитда қатнашишга қарор қилган", деб айтган Президент Дмитрий Медведев матбуот котибаси Наталья Тимакова.

"Буни драмалаштириш керак эмас. МДҲ тарихида бундай ҳодисалар бўлган. Бу ҳар бир мамлакатнинг ўзининг иши. Ҳозир йилнинг охири, ҳамманинг вақти тиғиз", деб айтган Россия Ташқи ишлар вазирининг ўринбосари Андрей Денисов "Интерфакс" ахборот агентлигига.

Йигирмага яқин масала

Аммо айрим кузатувчилар фикрича, бирданига бир неча мамлакат раҳбарининг мажлисда қатнашишдан воз кечгани МДҲ ташкилотининг тугаб бораётганининг ҳам нишонаси бўлиши мумкин.

Бошқалар назарида эса, бу МДҲга қизиқишнинг сусайиб бораётганини ҳам англатиши мумкин.

Би-би-си Украин хизмати билан суҳбатда Украина Президенти Виктор Юшченконинг айтишича, "МДҲ саммитларида қабул қилинган қарорларнинг уч ярим ёки 4 фоизи қачонлардир ҳаётга татбиқ этилган. МДҲ кам самара берадиган институтга айлангани афсусланарлидир ва унга нисбатан ишончсиз муносабат кучаймоқда".

Бироқ Президент Юшченко Кишинёв саммитида қатнашмоқчи эканини билдирган.

9 октябрга мўлжалланган саммит ҳозирги пайтда Ҳамдўстлик ташкилотига раислик қилаётган Молдова пойтахтида ўтмоқда.

Расмийларга кўра, ушбу йиғинда 20 га яқин масалани муҳокама этиш кўзда тутилган.

Улар орасида иқтисодий инқироз оқибатларини бартараф этиш, муҳожирлик сиёсати, наркотрафикка қарши кураш ва келгуси йил 9 майида нишонланадиган Ғалаба куни муносабати билан мурожаат масалалари бор.