Ўзбекистонда норасмий "Бирдамлик" ҳаракатининг муҳожиротдаги раҳбари Баҳодир Чориевватанига қайтишга қарор қилган.

Бу ҳақда жаноб Чориевнинг ўзи "Бирдамлик" ҳаракатининг интернет саҳифасида эълон қилган баёнотида очиқлаган.

"Бирдамлик" раҳбари Тошкентга шу ҳафтанинг жума куни йўл олаётганини маълум қилган.

Ҳаракат аъзоларига кўра, ташкилот ҳозирги кунда "АҚШ, Норвегия, Шветсия давлатларида расмий рўйхатдан ўтган бўлиб, Россия, Қозоғистон, Қирғизистон, Туркия, Украина ва Ўзбекистон ҳамда Қорақалпоқ Автоном республикасида ўз фаолиятини олиб бормоқда".

"Афсуски, ҳаракат ҳозиргача Ўзбекистонда ўз қурилтойини ўтказолгани йўқ," - дея эътироф этган Баҳодир Чориев. - "Ўтган 2008 йилнинг декабр ойига мўлжалланган ҳаракат қурултойи, аъзоларимизга нисбатан босим ва тазйиқлар кучайиб кетгани сабабли, уларнинг ҳавфсизлигини ўйлаб тўхтатилди."

”Бирдамлик” ҳаракати раҳбари ўз қарорини ҳаракат аъзоларининг "оғир кунларида, улар билан ёнма-ён туриб курашмоқни лозим топдим," - дея изоҳлаган.

"Мен ўз ихтиёрим билан шу йўлни танладим," - деб ёзади Баҳодир Чориев.

"Ўзбекистонда одамлар жуда тушкун кайфиятда, айниқса мухолифат фаоллари. Мен уларни руҳан, озми-кўпми қўллаб қувватламоқчиман", деди Баҳодир Чориев Би-би-си билан суҳбатда.

Ўзбекистонда тазйиқ остига олиниш эҳтимоллари ҳақида гапирар экан жаноб Чориев, ватан учун хизмат қилиш ва бу учун ҳатто қамалиш шараф эканлигини илова қилди.

Баҳодир Чориевга кўра, қонунуий томондан унинг Ўзбекистонга қайтиши учун ҳеч қандай тўсиқлар йўқ, фақатгина расмийлар бу каби тўсиқни атайлаб ўйлаб чиқишмаса бўлди.

“Бирдамлик” ҳаракати роппа-роса беш йил муқаддам Ўзбекистонда ташкил этилган.

Ҳаракат ўзининг асосий мақсади "Ўзбекистонда "эркинлик, адолат, бирдамлик тамойилларига асосланган, муносиб турмуш ва ҳар бир кишининг эркин, ҳар томонлама ривожланиши учун шарт-шароитлар яратилишини таъминлайдиган сиёсат юритувчи ижтимоий демократик давлат тузишда кўмаклашиш" эканини таъкидлаб келади.

Шу ой охирида 40 ёшни қаршилаётган Баҳодир Чориев Ўзбекистон расмийларининг унинг қайтишига муносабати қандай бўлишини билмаслигини айтган.

У озодликдан маҳрум этилиши ёда сиёсий фаолият олиб боришига қаршилик бўлмаслиги эҳтимоллари йўқ эмаслигини таъкидлаган.

Баҳодир Чориев 2005 йил майида Андижонда юз берган қуролли зўравонликлар ортидан Ўзбекистонни тарк этган ва Америка Қўшма Штатларида бошпана олганди.

"Бирдамлик" ҳаракати раҳбарининг Ўзбекистонга қайтишини қандай баҳолайсиз? Фикр ва мулоҳазаларингизни кутиб қоламиз.