Ўзбекистондаги болалар меҳнатига қарши пикет
Вашингтондаги Ўзбекистон элчилиги ташқарисида пахта теримида болалар меҳнатидан фойдаланилишига қарши пикет ташаббускорлари
ўзбек ҳукуматининг мазкур сиёсатидан норозилик изҳор этиш мақсадини кўзлаганлар.
Ушбу
норозилик тадбири ташкилотчиларидан бири Вашингтондаги Халкаро Меҳнат
ҳукуклари форуми ижроий раҳбари Бама ас-Сурайя Би-би-си билан суҳбатда
Ўзбекистон пахта теримига сафарбар этиш билан узоқ вақтлардан буён
болаларни эксплуатация этиб келишини айтди.
"Бу билан
болаларни мактабдан узиб олиб, таҳсил олишдан маҳрум этади. Менимча, бу
амалиётга чек қўйишнинг вақти етди. Ва биз Ўзбекистонда болалар
меҳнатини эксплуатация этиш ҳоллари давом этаётганидан одамлар ниҳоятда
хавотирда эканликларини кўрсатиш ниятидамиз", -деди Бама ас-Сурайя.
Унинг
айтишича, норозилик тадбирига жуда кўплаб ташкилотлар ҳомийлик
қилишмоқда. Уларнинг орасида АҚШ Меҳнат Иттифоки, Америка Ўқитувчилар
Федерацияси, Америкадаги коммуникация ходимлари, Адолатли Савдо учун
Талабалар уюшмаси, Халқаро Истеъмолчилар лигаси каби куплаб истеъмолчи
ширкатлар, ҳаттоки турли черковлар хам бор.
"Шунинг ўзидан ҳам мазкур масала юзасидан хавотир ва дастакнинг қанчалик кучли эканини кўришингиз мумкин", - деб айтди Бама
ас-Сурайя.
Пикет иштирокчиларига кўра, Ўзбекистонда болалар меҳнатидан фойдаланишни тўхтатишга эришиш мумкин. Чунки бу сиёсий иродага
боғлик масала ва Ўзбекистон ҳукуматида бу учун самимий истак бўлса, ҳал этиши мумкин бўлган муаммодир.
Вашингтондаги
норозилик чиқиши қатнашчилари мазкур масала юзасидан дунё ҳамжамияти
хавотирда эканини кўрсатиш билан ўзбек ҳукуматининг мазкур муаммога
жиддий эътибор қаратиб, ва ниҳоят унга буткул барҳам беришига
умидворлик билдирдилар.
Айни вақтда "Ўзбекистон инсон ҳуқуқлари альянси" аъзолари томонидан ўқитувчи ва ўқувчиларнинг эксплуатациясига қарши Жиззах
вилоятининг Ғаллаорол туманида режалаштирилган норозилик чиқиши милиция ходимлари томонидан тўхтатиб қолинди.
|