Норасмий Ўзбекистон Инсон ҳуқуқлари жамиятининг Қашқадарё бўлими фаоли Ғайбулло Жалилов шу йил 5 сентябрида ҳибсга олинганди, у билан бирга яна олти кишини жиноий гуруҳ ташкил этиб, террорчилик хуружини режалаштирганликда айблашмоқда.

Инсон ҳақлари фаоли ҳимоячиси ҳибсга олинганидан кейин қариндошларининг Ғайбулло Жалилов билан учрашишига изн берилмаган.

Сентябр ойидан буён унинг нега ҳибсга олингани, унга қандай айбловлар қўйилгани яқинлари учун ҳам қоронғу қолди.

Қашқадарё вилоят маҳкамасида бошланган маҳкамада Ғайбулло Жалиловга руҳий босим ўтказилгани яққол кўзга ташланади, дейди Париждаги "Марказий Осиёда инсон ҳуқуқлари" бирлашмаси раҳбари Надежда Отаева.

"Адолат қарор топишига умидини узганидан буткул тушкунликка тушган, ўзининг айбдор эмаслигини исботлашга ҳаракат ҳам қилаётгани йўқ", дейди Надежда Отаева.

"Марказий Осиёда инсон ҳуқуқлари" ассоциациясига кўра, Қашқадарё вилоят Миллий Хавфсизлик хизмати терговчилари Ғайбулло Жалиловга қарши кўрсатма бериши учун унинг рафиқасига тазйиқ ўтказганлар.

Армиядаги ҳарбий хизмати пайтида Ғайбулло Жалиловнинг бир ўпкаси жарроҳлик йўли билан олиб ташланган, ҳибсда сақланган вақтида унинг соғлиги ёмонлашган, бироқ унинг тиббий ёрдам олишига изн берилмаган.

"Марказий Осиёда инсон ҳуқуқлари" бирлашмаси раҳбари Надежда Отаеванинг айтишича, дастлабки тергов ҳужжатларида Ўзбекистондаги олдинги маҳкамаларда номлари тилга олинган Нажмиддин Жалолов, Аҳмад Бекмирзаев ва бошқалар ҳақида гапирилган, бироқ уларнинг ушбу маҳкамада айбдор сифатида кўрилаётганлар билан алоқаси, айнан қандай жиноят содир этгани ёхуд жиноятни режалаштиргани бирор бир далил билан исботланмаган.

Ушбу жиноий ишда яна бир неча шахслар айбдор сифатида тилга олинади.