'Фаолларга қарши таъқибларни бас қилинг'
"Хьюман Райтс Вотч" ўзбек ҳукумати инсон ҳуқуқлари фаолларининг фаолиятига тўсқинлик қилишни бас қилиши лозимлигини айтмоқда.
Халқаро ташкилотга кўра, расмий Тошкент уларнинг мамлакатда эркин ва ўз хавфсизликларидан хавотирланмай фаолият олиб боришларига
рухсат бериши керак.
"Хьюман Райтс Вотч"нинг айтишича, ўзбекистонлик масъуллар ўз тадқиқотчилари билан учрашишларига тўсқинлик қилиш учун яқинда
Қарши ва Марғилонда бир неча инсон ҳуқуқлари ҳимоячиларини ҳибсга олишган.
Таня Локшинанинг шу йилнинг 5 декабр куни Қаршида Нодир Аҳатов ва Гулшан Қораевалар билан учрашиш режаси амалга ошмаган.
Ташкилотга кўра, Қарши шаҳрида тадқиқотчилари номаълум шахснинг ҳужумига учраган, ҳибсга олинган ва сўнгра шаҳардан мажбуран
чиқариб юборилган. "Хьюман Райтс Вотч"нинг айтишича, бу ҳужум уюштирилган бўлиши мумкин.
Таня Локшинанинг эртаси куни Марғилонда Ўзбекистон Мустақил инсон ҳуқуқлари ташкилоти вакили Аҳмаджон Мадумаров билан учрашишига
ҳам имкон берилмаган.
"Хьюман Райтс Вотч"нинг айтишича, Аҳмаджон Мадумаров ўз тадқиқотчилари Марғилонни тарк этгунча милиция идорасида ушлаб турилган.
"Халқаро
иттифоқчилари инсон ҳуқуқлари соҳасида ижобий ўзгаришларга
эришганлигини айтиб, Ўзбекистон ҳукуматини олқишлашади. Бироқ инсон
ҳуқуқлари билан боғлиқ вазият бу каби олқишларга арзимайди," деб айтган
халқаро ташкилотнинг Оврўпо ва Марказий Осиё бўйича раҳбари Ҳолли
Картнер.
Картнер хонимга кўра, "Ўзбекистондаги инсон ҳуқуқлари масаласини ёритишга уринган ҳар қандай киши яққол ҳужумга учраш, ҳибсга
олиниш ва ёки бундан ҳам ёмонроқ оқибатларга тўқнаш келиш билан таваккал қилади".
Булар нимага боғлиқ?
Халқаро
ташкилотнинг айтишича, инсон ҳуқуқлари ҳимоячиларининг фаолиятларини
тўхтатишга бўлган сўнгги уринишлар бўлажак парламент сайловлари билан
боғлиқми ёки Ўзбекистондаги инсон ҳуқуқлари билан боғлиқ вазиятни
мубоҳаса этишга имкон бермасликка қаратилган давомий уринишларнинг бир
қисми, маълум эмас.
Ўзбекистондаги парламент сайловлари эса, жорий йилнинг 27 декабр кунига режаланган.
Ўзбек ҳукумати эса, "Хьюман Райтс Вотч" ташкилотининг Ўзбекистонда фаолият олиб боришига узоқ вақтдан бери қаршилик қилиб
келади.
Халқаро ташкилот 2008 йилдан буён Ўзбекистонда давомий фаолият олиб боришга имконсиздир.
"Хьюман Райтс Вотч"нинг айтишича, сўнгги тадқиқотчилари шу йилнинг 21 июл куни Тошкент аэропортидан ортга қайтариб юборилган.
|