Uznews.net
27.01.10 – Швециянинг Сундсвал шахри публицистика марказида сешанба куни
кечқурун ўзбек журналистлари ўзларининг шимолий европалик ҳамкасбларини
Ўзбекистонга эътибор қаратишга ва бу мамлакат муаммолари ҳақида кўпроқ
ёзишга ундашди.
Швеция шимолидаги Сундсвалда 26 январ куни бўлиб ўтган Ўзбекистон
ҳақидаги суҳбатнинг бош мавзуси, сўз эркинлиги муаммолари ва
Ўзбекистондаги журналистларнинг таъқибга учраётгани тўғрисида бўлди.
Публицистика марказига тўпланган швед журналистлари, журналистика
факультети журналистлари ўзбек ҳамкасбларидан, сўз эркинлиги йўқ
бўлган, ҳақиқатни ёзганинг учун сени турма, калтаклар ва сургун
кутадиган мамлакатда мухбир бўлиш нима эканлигини билиб олишди.
Ўзбек журналист Қудрат Бобожонов сўнгги маҳкум, ўзбек телевидениесининг
спорт шархловчиси Хайрулло Ҳамидовнинг ҳибсга олиниши, ва ўзбек халқига
ҳақорат ва тухмат қилишда айбланаётган кинодокументалист ва фотограф
Умида Ахмедовага қарши тайёрланаётган суд жараёни ҳақида гапирди.
Бу даражадаги тубанликка қадар 90 йиллардан бошлаб муттасил бир тарзда
кўп йиллар эркин матбуот қатламини тозалаш билан шуғулланилгани ҳақида
гапирди.
Бирин кетин мустақил телестанциялар, радио, газеталар, ОАВни қўллаб
қувватловчи халқаро ваколатхоналар ёпилди, мустақил журналистлар ҳибсга
олинди ёки мамлакатдан қувғин қилинди. Эндиликда эса ҳукумат
қолганларга зуғум қилишда давом этмоқда.
Журналистларга нисбатан оммавий қатағонларнинг бошланишига 2005 йилнинг
13 майида содир бўлган қонли Андижон воқеалари сабаб бўлди.
Оммавий отувдан кейин Андижонда бўлган Швед журналисти Элин Йоннсон, ўз
ҳамкасбларига қирғиннинг миқёси ҳақида гапириб берди. Йоннсон Андижон
воқеаси ҳақида "Оммавий қотилликни яшириш санъати” деб номланган китоб
ҳам чоп қилган.
Учрашув "Инсон ҳуқуқлари бўйича Ўзбек немис форуми” томонидан
тайёрланган ўзбек пахтачилигида болалар меҳнатини эксплуатация қилиш
ҳақидаги "Пахта гулининг тикони” фильми намойиши билан якунланди.
Қудрат Бобожоновнинг сўзларига кўра, учрашув тингловчиларда чуқур
таассурот қолдирган. Айрим швед журналистлари, бу узоқ, бироқ инсон
ҳуқуқларининг бузилиши каби нохуш вазият туфайли яқин бўлиб қолган
мамлакат ҳақида ёзиш истакларини билдиришган.
Uznews.net