"Ўтган 2009 йил давомида 70 журналист ҳалок этилди. Бу - охирги 30 йилда қайд этилган энг ёмон кўрсаткич," дея хабар беради Журналистларни Ҳимоя Қилиш Қўмитаси (ЖҲҚҚ).

Ҳозирда дунё бўйлаб 150 та журналист қамоқда сақланмоқда, дейди ЖҲҚҚ.

Қўмитага кўра, журнализм ҳукумат томонидан амалда жиноятга тенглаштирган Эронда эса ўтган йилнинг ўзида 60 журналист ҳибсга олинган.

ЖҲҚҚнинг айтишича, айниқса интернет журналистлари тазйиқ ва таҳдидларга дуч келмоқдалар.

Қароргоҳи Нью-Йоркда жойлашган ЖҲҚҚнинг "2009 йилда матбуотга ҳужумлар" номли ҳисоботида таъкидланишича, дунё бўйлаб қамоққа олинган журналистларнинг ярмидан кўпроғини интернет журналистлари ташкил этади.

Сўнгги 10 йилда Хитой журналистлар учун энг хавфли мамлакатлигича қолмоқда.

Хитойда ҳозирда 24 журналист қамоқда сақланмоқда.

Хитой ортидан Эрон, Куба, Эритрея, Бирма ва Ўзбекистон келади.

Бирлашган Миллатлар Ташкилоти биносида ўтказилган матбуот анжуманида гапирган ЖҲҚҚ мулозимига кўра, халқаро босимлар журналистларга нисбатан ҳукумат ва ноҳукумат ташкилотлар томонидан ўтказилаётган тазйиқларга қарши курашишнинг энг мақбул йўлидир.

Блогнавислик сингари янги матбуот соҳаларининг ривожланиши қатағонлар ва цензурага қарши мужодалада янги имкониятларни яратди, дея илова қилади ЖҲҚҚ.

Бироқ ЖҲҚҚнинг огоҳлантиришича, Хитой ва Тунис сингари давлатлар бундай имкониятларни журналистларга қарши йўналтириб юборишлари ҳам мумкин.

Қўмитага кўра, Эрон ҳукумати диссидентлар ва мухбирлар изига тушишда ижтимоий интернет тармоғларидан фойдаланаётган экан.

Ўзбекистондаги вазият

Журналистларни Ҳимоя Қилиш Қўмитаси Ўзбекистонда ҳукумат матбуот устидан кучли цензура ўрнатганини айтади.

ЖҲҚҚ ҳисоб-китобларига кўра, Ўзбекистонда ўтган йилнинг ўзида камида етти журналист ҳибсга олинган.

Қамоқдаги журналистлар сони бўйича Ўзбекистоннинг "минтақада пешқадам" экани ЖҲҚҚ ҳисоботида алоҳида таъкидланган.