Туркистон Исломий ҳаракати аъзоларига ҳукм
|
Ўтган ёз Исфарадаги айни хонадонда жангарилар билан тўқнашув кечган |
Тожикистонда Туркистон Исломий ҳаракатига мансубликда ва ташкилотга ёрдам берганлик айблари билан 4 киши узоқ йиллик қамоқ
жазосига ҳукм этилган.
Улар орасида ҳали касб-ҳунар мактаби ўқувчиси бўлган Насибуллоҳ Забирзодга саккиз йил қамоқ жазоси тайинланган.
Қолган уч нафар айбланувчи эса 15 йилда 30 йилга қадар озодликдан маҳрум этилганлар.
Ҳимоясилар эса айбланувчиларнинг ҳеч бир ташкилотга аъзо бўлишмагани ва чиқарилган ҳукм адолатдан эмаслигини айтишмоқда.
Айбланувчилар
орасида энг ёши бўлмиш Насибуллоҳ Тожикистонда қидирувда бўлган
Туркистон Исломий Ҳаракати фаоли ва унинг шерикларига озиқ-овқат
етказиб бериб турганликда айбланган.
Аммо Насибуллоҳнинг ҳимоячиси, унинг ўз амакиси Туркистон Исломий Ҳаракатига аъзо бўлгани ҳақида билмагани ва унга қариндошлик
юзасидан ёрдам берганини урғуламоқда.
Уч кишига нисбатан "жиноий гуруҳ тузиш ва аъзо бўлиш”, "ноқонуний қурол асраш " каби айблар қўйилган.
Улардан бири ўтган йили милиция мулозимига қуролли ҳужум қилишда ҳам айбланди.
Суғд вилояти Ички ишлар бошқармаси бошлиғи генерал Рауф Юсуповнинг айтишича, сўнгги йилларда айни ҳаракат аъзолари асосан
милиция ходимларига ҳужум қилишлари кузатилмоқда.
Ўтган икки йил давомида милиция ходимларига тўрт карра ҳужум уюштирилган. Ўтган йилда Тожикистонда 20 нафарга яқин киши Туркистон Исломий ҳаракатига мансубликда кўрилиб қўлга олинган.
Ҳозирда бу ҳаракат мансублари сифатида кўрилаётган 40 дан ортиқ киши қидирувда бўлиб, улар ҳақидаги маълумотлар ва расмлари
маҳаллий телевидениелардан бирида кўрсатилган.
Айни бир пайтда Исфара шаҳрида яшаётган диндорлар Туркистон Исломий ҳаракатига мансубларни қидириб, қўлга олиш жараёнида бу
ҳаракатга алоқаси бўлмаган кишиларнинг жабрланиб қолишидан хавотирлик билдиришади.
http://www.bbc.co.uk/uzbek/news/story/2010/02/100215_tajik_trial.shtml
|