АҚШ расмийларининг айтишича, нуфузли Толибон ҳарбий қўмондони дея тасвирланган Мулло Абдул Ғани Барадар Покистонда қўлга олинган.

Толибоннинг иккинчи энг юқори қўмондони дея билинган бу исёнчи бир неча кун аввал АҚШ ва Покистоннинг қўшма рейдида Карачида ҳибсга олинган. Бу ҳақида New York Times газетаси хабар қилди.

Покистон хабарни тасдиқламади, Толибон эса уни рад этди.

Унинг қўлга олиниши Афғонистон жанубида Толибон жангариларига қарши йирик НАТО бошчилигидаги амалиёт манзарасида маълум бўлмоқда.

Мухбирларга кўра, Мулла Барадар Афғонистон жанубидаги Толибоннинг узоқ муддатли стратегик ҳарбий режаларини тузишга масъулдир.

Агар унинг ҳибсга олингани тасдиқланса, бу Толибоннинг исёнчилик амалиётларига қаттиқ таъсир қилади.

АҚШ расмийси ABC News билан суҳбатда ҳибсни "ўта йирик муваффақият" ва "ўта муҳим" воқеа дея тасвирлаган.

АҚШ рўзномалари Мулла Барадар 2001 йилда АҚШ Афғонистонда уруш очганидан бери қўлга туширилган энг аҳамиятли Толибон аъзоси дея хабар қилишмоқда.

Бироқ, Толибон воизи хабарларни рад қилган, ҳамда Мулла Барадар ҳали ҳам Афғонистонда экани ва гуруҳнинг ҳарбий ва сиёсий амалиётларини мувофиқлаштириб келаётганини айтган.

"У қўлга олинмади. Улар бу каби хабарларни тарқатиб одамларнинг диққатини Маржадаги мағлубиятларидан узоқлаштирмоқчи, халқни бошини айлантирмоқчи," - деди воиз Забиҳулло Мужоҳид.

Маржа

Айни дамда НАТОнинг Афғонистон жанубидаги ҳужуми тўртинчи кундирки давом этмоқда.

Маржа шаҳрида Америка қўшинлари яхши қуролланган исёнчилар мудофаасига юз тутмоқда.

Британиялик қўмондон Ник Паркер Би-би-си билан суҳбатда мазкур амалиёт келгуси ҳужумлар учун яхши андоза бўлиб хизмат қилишини айтган.

Унинг айтишича, ҳужум бошлашдан анча аввал хабар бериш билан оддий инсонларнинг ҳаётини сақлаб қолиш мумкин.

Унинг бу сўзлари айни амалиётда 17 оддий афғоннинг нобуд бўлиши манзарасида янграмоқда.

http://www.bbc.co.uk/uzbek/news/story/2010/02/100216_baradar.shtml