Туркия раҳбарлари мамлакат Қуролли кучлари Бош қўмондони Генерал Илкер Башбуг билан "ҳукуматни тўнтаришга уриниш фитна"сини мубоҳаса қилишган.

Бир неча соатлик музокаралардан сўнг томонлар Туркиянинг муаммолари мамлакат "конституциясига мувофиқ" ҳал этилиши кераклигини айтишган.

Бош вазир Ражаб Тойиб Эрдўған, Президент Абдулло Гул ва Генерал Илкер Башбуг ўртасидаги учрашув 20 нафар ҳарбий зобит ҳукуматни тўнтаришга уринишда айбланиши ортидан кузатилди.

Туркиядаги ушбу уч кудратли шахс пайшанба куни Анқарадаги президент саройида музокаралар олиб боришди.

Эрдуған жанобларининг маҳаллий матбуотга айтишича, мазкур учрашув "жуда яхши" ўтган.

"Туркия ҳукумати мамлакат қуролли кучлари устидан қанчалик ҳукмрон экани юзасидан шу пайтга қадар кузатилмаган йирик синов қаршисида қолди",-деб хабар қилади Би-би-сининг Истанбулдаги мухбири.

Фитна

Ўтган уч йил ичида бир неча бор даъво қилинган ҳарбийлар фитналари ҳукумат ва қуролли кучлар орасидаги тангликни янада оширган.

"Ҳукуматни тўнтаришга уриниш фитнаси"да айбланаётган 20 киши орасида жуда юқори мартабали ҳарбийлар ҳам бор.

Денгиз ва Ҳаво кучлари собиқ қўмондонлари ҳали ҳамон сўроқ қилинмоқда.

Бошқарувдаги Адолат ва Тикланиш партияси 2002 йилги сайловларда жиддий ғалаба билан қудратга келганди.

Айбдорлар эса, айни ҳукуматни ағдариш фитнасига тил бириктиришда айбланишмоқда.

Ҳарбийлик бирон бир фитнага бош қўшмаганини айтади ва ўтган тун ўз зобитлари иштирокида "жиддий вазият"ни муҳокама қилиш учун фавқулодда мажлис ўтказган.

Қораловчилар ўтган бир ой давомида беш минг саҳифага яқин ҳужжатларни ўрганиб чиқишган. Фитна тафсилотлари акс этган ушбу ҳужжатлар Туркия газеталаридан бирига чиқиб кетганди. Унда Туркияда қатор ҳужумларни уюштириш билан ҳарбийларнинг аралашувини оқлаш даражасида тало-тўп келтириб чиқариш хусусида сўз боради.

Туркия армиясининг айтишича, ҳужжатларда фақатгина мамлакатда тартиб-интизом издан чиқиб кетган пайтдаги назарий сценарийлар кўзда тутилган.

Туркия ҳарбийлиги 1960дан бери тўрт ҳукуматни ё ағдарган ва ё истеъфога чиқишга мажбурлаган. Энг сўнггиси яқин ўтмишда-1997 йилда юз берганди. Генерал Башбуг эса, ҳукуматни ағдариш фитналари ўтмишнинг ҳодисаси эканини таъкидлаган

http://www.jakob.clan.su/news/turkija_rabarlari_armija_wmondoni_bilan_uchrashdi/2010-02-26-2088