Паркент туманида норозилик чиқиши ўтказилди
Ўзбекистондан
келаётган хабарларга кўра, Тошкент вилояти Паркент тумани марказида
юздан ортиқ киши иштирокида норозилик намойиши бўлиб ўтган.
Намойишчилар ҳуқуқ-тартибот органлари мулозимларидан маҳаллий инсон
ҳуқуқлари фаоли Азамат Ёқубовни ҳибсдан озод этишни талаб қилганлар.
Кеча Паркент ҳуқуқ-тартибот ходимлари томонидан ҳибсга олинган Азамат Ёқубовга товламачилик айблови қўйилмоқда.
Намойишда қатнашганлардан бири нафақахўр Олим Ҳасанов Би-би-си билан суҳбатда норозилик чиқишига "150 нафарга яқин киши иштирок
этган"ини айтди.
Олим Ҳасановнинг айтишича, можаро Паркент туманига тегишли Навбаҳор қўрғонига газ ётқизиш лойиҳаси билан боғлиқ.
"Навбаҳор
қўрғонига газ олиб бориш учун бир проект қилган экан-да, иш
бошлаганидан кейин тўхтатиб қўйганлар... "Одамлардан пул йиғдинг", деб
қамаб қўйган Ёқубов Азаматни. Шунга норозилик билдиришаяпти маҳалланинг
одамлари",-дейди Олим Ҳасанов.
Олим Ҳасановнинг тасдиқлашича, Азамат Ёқубов газ ўтказиш лойиҳаси учун одамлардан пул тўплаган ва уни мана шу лойиҳани амалга
ошириш учун сарфлаган.
Аммо,
айтилишича, лойиҳаси охирига етказилмай туман ҳокимияти томонидан
тўхтатиб қўйилган. Олим Ҳасановнинг билдиришича, газ ўтказиш лойиҳаси
бошқа одамга сотиб юборилган ва Азамат Ёқубов "фирибгар"ликда айбланиб
қамоққа ташланган. Аммо, унга кўра, Азамат Ёқубовга нисбатан ҳали
жиноий иш очилмаган.
"Жиноий ишнинг ўзи, аломати ҳам йўқ. Энди одамлар ҳаммаси айтиб турибди: "пулни биз бердик-ку, биз ёзишимиз керак. Сен нима
учун олиб бориб тиқиб қўйдинг", деб сўрашаяпти. Аммо, прокурор шу саволга жавоб беролмаяпти".
Олим Ҳасановга кўра, прокурор одамлардан йиғилган 5 миллион сўм келтириб берилсагина Азамат Ёқубов қамоқдан озод қилинишини
айтган.
"Аммо, одамлар бу пул етказиб берилса, Азамат Ёқубовга расман таъмагирлик айблови қўйилишидан қўрқишади", дейди у.
Ҳасанов маҳалла одамлари вилоят ҳуқуқ-тартибот органларига ҳам мурожаат қилишгани, аммо фойдаси бўлмагани ҳақида айтади.
Норозилик намойиши ҳақидаги хабарлар мустақил манбалар томонидан тасдиқлангани йўқ.
Аммо кузатувчиларга кўра, ҳар қандай норозилик қатъий назорат қилинадиган Ўзбекистонда бу каби ўнлаб инсонларнинг кўчага чиқиши
ўтган бир неча йил ичида мисли кўрилмаган ҳодиса бўлиши мумкин.
|