Қозоғистон Президенти Ўзбекистонга боради
Келаётган ҳафта бошида Қозоғистон Президенти Нурсултон Назарбоев расмий иш сафари билан Ўзбекистонга боради. Охирги тўрт йилда
илк бор Тошкентга келаётган Назарбоев жаноблари 16-17-март кунлари мамлакатда меҳмон бўлади.
Сафар давомида икки давлат ўртасидаги ўзаро манфаатли бўлган сиёсий алоқаларни давом этиши учун музокаралар олиб борилиши
кутилаётир.
Бундан
ташқари 2008 йил Каримов Остонага келиб имзолаган икки томонлама
ҳамкорлик оид келишувларнинг кейинги босқичи ҳам муҳокама қилиниши
мумкинлиги айтилади.
Икки давлат ўртасидаги алоқаларни янада мустаҳкамлаш борасида бир нечта ҳужжатлар имзоланиши мумкин. Яна пойтахтларда элчихона
қуриш учун ер ажратиш масалалари ҳам кўриб чиқилади.
Ташқи ишлар вазирлиги матбуот хизмати Би-би-сига икки томонлама иқтисодий алоқаларнинг яхши кетаётгани борасида гапирди. Аммо,
айнан қанақа аниқ ҳужжат имзоланиши ё-да, қандай масала кўтарилиши борасида маълумот бермади.
Расмийлар
икки давлат ўртасида иқтисодий алоқалар яхшилигини айтиб келишса-да,
мустақил кузатувчилар бу борада ишлар кўнгилдагидек эмаслигини
таъкидлайдилар. Яъни, икки ён қўшни бўлган давлатнинг савдо айланмаси 1
миллиарддан озроқ ошишини бу икки давлатнинг иқтисодий салоҳиятидан
анча пастлигини айтишади. Ўтган йили ўзаро савдо айланмаси 33 фоизга
яъни 3 дан 1га қисқарган. Томонлар буни иқтисодий инқирознинг таъсири
дейишаётган бўлса-да, мутахассислар бу алоқаларнинг йилдан йилга
ёмонлашиб бораётгани аломати эканини таъкидлашади.
Яна бир
мисол, икки давлат ўртасида 1995 йилда эркин иқтисодий ҳудуд яратишга
асос солувчи қонун имзоланган бўлса-да, бу борадаги ишлар бугунга келиб
кўнгилдагидек кетмаяпти. Ўзбекистонда Қозоғистонлик тадбиркорларга
нисбатан ўтган йилларда босимлар кўрсатилиши эса, муносабатларнинг
ривожланишига соя солгани айтилади.
Лекин, бошқа
кучлироқ давлатларнинг аралашуви асосида икки давлат ўртасида нефт ва
газ соҳасида яхши алоқалар йўлга қўйилган. Мисол учун, Ўзбекистон
Қозоғистоннинг жанубини газ билан таъминлаши эвазига, Қозоғистон
ғарбдаги газларини Ўзбекистон номидан четга экспорт қилади. Ёки Хитой
бошчилигида Туркманистондан Ўзбекистон ва Қозоғистон орқали ўтувчи газ
қувурининг ётқизилиши икки давлат ўртасида иқтисодий алоқаларнинг
ижобий жиҳатлари сифатида кўрилади.
|