Қирғизистон Қадамжой туманидаги барча чегара постларини ёпиб қўйди. Ўзбекистон чегарасида зирҳли техника кўрина бошлади

Содир бўлган воқеа жойида турган Қирғизистон Миллий телерадиокомпаниясининг Баткен вилояти бўйича мухбири Медербек Ниязалиевнинг "Фарғона.Ру” агентлигига маълум қилишича, айни пайтда чегаранинг икки томонида бир неча юз киши тўпланиб турибди. Уларнин орасида турли ҳуқуқ-тартибот идоралари ходимлари бор. Ўзбекистон томонида бир неча БТР ва БМТлар ҳамда 700 та чегарачи ва 300 та десантчи кўрина бошлади.

Шу ернинг ўзида манбамизга кўра, Баткен вилоятининг ҳокими турибди. Чегара хизмати раиси Қурманқул Матеновнинг келиши кутилмоқда.

Эслатиб ўтамиз, 26 майга ўтар тунда Ўзбекистоннинг Сўх тумани Хушёр қишлоғида истиқомат қилувчи бир гуруҳ одамлар Сўх анклави орқали Қирғизистоннинг Сўғмант қишлоғига ўтиб кетмоқчи бўлган тўртта "Тико” ва "Жигули” автомашиналарининг йўловчиларини калтакладилар. Тажовуз қилганлар можарога қирғизистонлик чегарачиларни ҳам жалб қилмоқчи бўлдилар, аммо улар ўзларини тийишни афзал билдилар. Ўзбекистон фуқаролари уларнинг ҳаммасини гаровга олмоқчи бўлдилар, бироқ йўловчилар қочиб кетишга улгурдилар. Хушёрда ҳайдовчилар машиналари билан қолдилар, уларни эртаси куни қўйиб юбордилар.

Баткен вилояти ҳокимлиги тақдим этган ахборотда айтилишича, Сўғмант қишлоғидаги яйловдан фойдаланиш бўйича мунозара Хушёр қишлоғи аҳолисининг норозилигига сабаб бўлган. Хушёрликлар шу чоққача ёз пайтида бу ерда чорваларини ўтлатиб юришган. Бироқ янги давлатлараро битим кучга кирганидан сўнг улар бу имкониятдан маҳрум бўлдилар.

Ўзбекистоннинг Хушёр қишлоғи аҳолиси 29 май куни Қирғизистоннинг Чорвоқ қишлоғига олиб борувчи йўлни бузиб ташлаган. Ўз навбатида, Баткен вилояти аҳолиси Ўзбекистоннинг Риштон шаҳрига олиб борувчи йўлни тўсиб қўйдилар. Бундан ташқари, Жаштилек қишлоғи яқинида қирғизистонликлар тошлар билан йўлни тўсиб қўйдилар ва Ўзбекистон фуқаролари 26-чидан 31 майгача баткенликларнинг ўнта машинасига зарар етказилиши юзасидан чора кўришни талаб қилмоқдалар.