Ҳамбургдаги масжид ёпилишида Ўзбекистон ҳам тилга олинди
Олмония полицияси шимолий
Ҳамбург шаҳридаги "Тоиба" масжидини ёпган. Масжидга исломий
экстремистлар дея гумон қилинган шахслар учрашаётганлари борасидаги
хабарлар ортидан рейд ўтказилган.
Ҳамбург шаҳри полицияси душанба куни эрталаб
рейд ўтказган ва "Тоиба" масжидидаги қатор компютерлар ҳамда бошқа
жиҳозларни мусодара этган.
Жосуслик хизмати расмийлари масжид радикал
исломий жангарилар учун муҳим учрашув жойи бўлгани ва бино АҚШга қарши
2001 йил сентябр ҳужумларидан бери кузатиб келинганини айтишади.
Расмийларга кўра, собиқда "Ал-Қудс" номи билан
маълум масжидда Муҳаммад Атта дохил 2001 йил 11 сентябр ҳодисаларининг
айрим ҳужумчилари учрашиб туришган ва бу ер ҳужумлардан сўнг ҳам исломий
ақидапарастлик ўчоғи бўлиб қолган.
Текширувчиларнинг айтишларича, ўтган йил аксари олмонлардан иборат 11 жиҳодчи ҳам ушбу масжидда кўришган.
Улар кейин Покистон ва Афғонистондаги террорчилар тайёрлов жамлоқларига йўл солишган.
Даъво қилинишича, Ислом динини қабул қилиган олмонлардан бири Ўзбекистон Исломий ҳаракатига қўшилган.
Ҳамбург полицияси бошлиғи Кристов Аҳлҳаус бу масжидда жангарилик фаолиятлари олиб борилганини айтади.
"Тоиба узоқ йиллардан бери мужоҳидлар
учрашадиган нуқта бўлиб келган. Мужоҳидлар ташвиқот, режалар ва пул
ёрдамида умумжаҳон жиҳодини ёки маъқуллашади ва ёки қўллашади" деди
жаноб Аҳлҳаус.
Полицияга кўра, масжид биносидаги тинтувдан кейин бу масжидга боғлиқ маданий марказ ҳам ёпилган.
Ҳамбург полицияси раҳбарининг сўзларига кўра, улар масжидни ёпиш учун етарли далилга эга бўлганлар.
"Агар бу ташкилотнинг аксилконституцион фаолият
билан шуғулланганига доир қўшимча исбот-далил керак бўлса, айтиб ўтай,
"Ҳамбург-Тур" деб номланган гуруҳ бўлган ва улар мужоҳид бўлиб
тайёргарликдан ўтиш учун Афғон-Покистон чегарасидаги махсус жамлоқларга
боришган. Ташкилотни маън этиш учун биз рисоладагидек йўл тутдик. Йиллар
давомида бу ташкилот тажовузкорона ва аксилдемократик мафкура ҳамда
диний қарашларни ёйиб келаётган эди", деди Кристов Аҳлҳаус.
Ҳамбург полицияси раҳбари исломий экстремист деб кўрилган кучларга қарши муросасиз кураш олиб боришларини қайд этди.
"Биз Олмонияда исломий жамият қуриш
ҳаракатларига аралашган ва бу йўлда зўравонликдан ҳам қайтмайдиган
одамлар учун Ҳамбург учрашув нуқтаси бўлишини истамаймиз" деди Кристов
Аҳлҳаус.
http://www.bbc.co.uk/uzbek/world/2010/08/100809_cy_germany_mosque.shtml
|