Сурхондарёлик амалдорлар тақдири қил устида
"Эзгулик” хабар қилади.
Шу йилнинг июнь ойида Сурхондарё вилояти Табиатни муҳофаза қилиш
қўмитаси раиси Рўзигул Сафарова, вилоят Солиқ бошқармаси бошлиғи Рустам
Қўчқоров, Термиз шаҳар ҳарбий гарнизони бошлиғи Владимир Цой, Денов
тумани ҳокими Абдусамат Ҳожиқулов сингари 20 га яқин амалдорлар вилоят
ҳуқуқни муҳофаза қилиш органлари томонидан ҳибсга олинди. Вилоят МХХ
бошқармаси ертўласида сақланаётган амалдорларнинг қариндошлари, яқинлари
Ўзбекистон инсон ҳуқуқлари "Эзгулик” жамиятига мурожаат қилиб, судсиз,
сўроқсиз ушлаб турилган яқинлари тақдиридан хавотир билдиришмоқда.
Хусусан, Рўзигул Сафарованинг отаси Тўхта бобонинг аризасида қизининг
ўзларига кўрсатилмаётгани, унга қандай айблов қўйилаётгани
айтилмаганини таъкидланган. Ҳимоя ҳуқуқидан маҳрум қилинган Рўзигул
Сафарованинг укаси Икром опасига қарши кўргазма бериш учун ноинсоний
қийноқларга солиниб, зўраки иқрорликлар олишга уринилгани қайд қилинади.
Соғлиғи-ю, ҳаёти хавф остида қолаётгани айтилаётган Денов тумани ҳокими
Аддусамат Ҳожиқуловнинг иши судга чиқмасданоқ унинг уй-жойлари,
мол-мулклари талон-тарож қилинмоқда. Солиқчи Рустам Қўчқоровнинг ҳам
қийноқларга солинаётгани ҳақида маълумотлар бор.
Мамлакатимиз қонунчилиги, халқаро ҳуқуқий нормаларда шахснинг қандай
жиноятда гумон қилинишидан қаътий назар ҳимоя ҳуқуқининг мавжудлиги
эътироф этилган. Хусусан, Конституциянинг 25-моддасида "Ҳар ким эркинлик
ва шахсий дахлсизлик ҳуқуқига эга. Ҳеч ким қонунга асосланмаган ҳолда
ҳибсга олиниши ёки қамоқда сақланиши мумкин эмас”, 116-моддасида эса:
"Айбланувчи ҳимояланиш ҳуқуқи билан таъминланади. Тергов ва суд ишини
юритишнинг ҳар қандай босқичида малакали юридик ёрдам олиш ҳуқуқи
кафолатланади” дейилган. Бироқ шунга қарамай ҳибсга олиниб, қарийб икки
ойдан бери изоляторда тутиб турилган амалдорларга қўйилаётган айбловлар
ошкор қилингани, гумондорлар яқинларига кўрсатилгани йўқ. Афсуски,
кўпчилик фуқароларнинг коррупционер раҳбарларга нисбатан негатив
муносабати туфайли зўровонлик билан тутиб турилган амалдорлар ҳодисаси
жамоатчиликда ташвиш уйғотаётгани йўқ, аксинча, кўпчилик бу воқеалардан
мамнун.
Ўзбекистон инсон ҳуқуқлари "Эзгулик” жамияти сурхондарёлик амалдорлар
тақдиридан хавотир изҳор қилиб, Ўзбекистон Республикаси Бош
прокуратурасини мазкур ҳолатлар юзасидан изоҳ беришга чақиради.
Ўзбекистон инсон ҳуқуқлари "Эзгулик” жамияти
|