Носир Зокир - 60 ёшда!

Бугун ўзбек мухолифатининг кўзга кўринган вакили, таниқли журналист Носир Зокир 60 ёшга тўлди. Ҳеч ишонгинг келмайди. Наҳотки йигитлардек абжир, хушчақчақ, одамшаванда бу инсон олтмишга кирган бўлса!

Ҳа, йиллар шу қадар шафқатсиз, тутқич бермас. Кўз очиб юмгунча вақт ўтади. Шу ўтган вақт ичида нимадир қилишга улгурсангиз бахтлисиз, бўлмаса фақат пушаймонлик қалбингизни эгаллаб олиб сизга тинчлик бермайди.

Носир Зокирнинг олтмиш йиллик ҳаёти бутун ўзбек халқига ўрнак бўлгулик эмасми? Совет Иттифоқи пайтида Намангандаги маданият даргоҳларида ишлаб юрган Носир Зокир қайта қуриш йилларидаёқ мухолифат сафларига келиб қўшилди. У ўз ҳаётининг асосий қисмини "Бирлик” халқ ҳаракати билан боғлади. Ватанимизда мустақиллик қарор топишига, ўзбек тилига давлат тили мақоми берилишига ва бошқа тарихий ишларга катта ҳисса қўшди.

Мустақилликдан кейинги йилларда Носир Зокир Ўзбекистон Инсон Ҳуқуқлари Жамияти фаоли сифатида минглаб инсонлар ҳуқуқларини фаол ҳимоя қилди. Нафақат Наманган, балки бутун Фарғона водийсида адолат ва ҳақиқат қарор топиши учун қўрқмасдан кураш олиб борган бу инсонни яхши танишади.

"Озодлик” радиосидаги фаолияти Носир Зокирни бутун минтақага танитди. Унинг ҳеч кимникига ўхшамайдиган жарангдор ва ўктам овози, Ўзбекистонда инсон ҳуқуқлари бузилишига оид тайёрлаган турли мавзулардаги хабар ва лавҳалари билан ҳақиқатга ташна минглаб инсонлар хонадонига кириб борди. Ҳар куни радио эшиттиришлари бошланди дегунча ҳамма Носир Зокирни чиқишларини кутарди. Носир Зокир ўзбекнинг, Ўзбекистонлик миллионлаб инсонларнинг овози ва ғурури эди.

Афсуски, "Озодлик” радиосининг Тошкентдаги офиси ёпилиши сабабли Носир Зокирнинг овози радиодан эшитилмай қолди. Халқимиз гўёки радиодаги ўз овозидан айрилгандек эди.

Андижон воқеаларидан кейин кўпчилик журналистлар ва инсон ҳақлари ҳимоячилари Ўзбекистонни тарк этишди. Қанчалик қийин бўлмасин Носир Зокир ватанда қолиб ўз фаолиятини давом эттирди. У "Бирдамлик” ҳаракати фаолиятини бутун водийда кучайтиришда ўз хизматини аямади. Носир Зокирнинг саъй-ҳаракатлари билан "Бирдамлик” водий узра қулоч ёйди. Кўплаб зиёлилар ҳаракатга келиб қўшилди.

Бугун таниқли мухолифат фаоли, инсон ҳақлари курашчиси ва машҳур журналист Носир Зокир 60 ёшга тўлибди. Ҳеч ишонгимиз келмайди.Чунки, бу азиз инсон ҳали қалбан, руҳан ёш. Халқимизнинг Носир Зокирдан умидлари катта. Ватанимизда демократия тўла қарор топиши, инсон ҳуқуқлари вазияти яхшиланишига ва матбуот эркинлиги таъминланишига бу улуғ инсон тажрибалари ва фаолияти жуда ҳам муҳим.

Носир Зокирга ўхшаган инсонлар минг йилларда бир марта дунёга келсалар ажаб эмас. Ўзбекистонда ҳеч бўлмаганда Носир Зокирга ўхшаган ўнта киши бўлганида борми, балки аҳвол бошқача бўлармиди? Афсуски, Носир Зокир ягона ва унга ўхшаган инсонлар деярли йўқ.

Биз шу шукуҳли ва фараҳли онларда сафдошимиз Носир Зокирни муборак 60 ёши билан чин қалбимиздан табриклаймиз. Ҳали қиладиган ишларимиз олдинда. Ҳаёт энди бошланаётгандек гўё… Келажагимиз тонглари Носир Зокир сингари заҳматкаш инсонлар билан, бирдамлик билан ёришсин!

Олтмиш ёшингиз муборак бўлсин!

Ёдгор Турлибеков, АҚШ.
Толиб Ёқубов, Франция.
Дадахон Ҳасан, Тошкент.
Обид Асомов, Россия.
Искандар Худойберганов, Тошкент.
Абдулазиз Маҳмудов, Тошкент.
Гулчеҳра Нуруллаева, Тошкент.
Дилором Исҳоқова, Тошкент.
Мўътабар Тожибоева, Франция.
Исмоил Дадажонов, Швеция.
Матлуба Азаматова
Зулфия Ҳайдарова, Ўзбекистон.
Саида Қурбон, Жиззах.
Елена Урлаева, Тошкент.
Баҳодир Ҳасан, АҚШ.
Бахтиёр Исабеков, Тошкент.
Жўрабек Ражаббоев, Ўзбекистон.
Абдужалил Бойматов, Ирландия.
Алишер Таксанов, Швецария.
Тўлқин Қораев, Швеция.
Зокиржон Ибрагимов, Швеция.
Юсуф Расул, Швеция.
Абдужаббор Исмоил, Россия.

Баҳодир Намозов, Тошкент.
Башорат Ешова, Швецария.
Гулшан Қораева, Қарши.
Ирина Перевозчикова, Россия.
Карим Бозорбоев, Сирдарё.
Зиёдулло Раззоқов, Жизах.
Ғани Раҳматов, Қашқадарё.
Абдуқодир Саттаров, Андижон.
Аҳад Набиев, Фарғона.
Дилноза Қаҳорова, Россия.
Мажид Абдураимов, Сурхондарё.
Ҳайит Ғафур, Швеция.
Муҳиддин Қурбонов, Швеция.
Бахтиёр Мамажонов, Қозоғистон.
Мамир Азимов, Жиззах.
Фахриддин Жўраев, Россия.
Нодир Ахатов, Қарши.

2010 йил, 20 август.

www.yangidunyo.com